„ნაციონალური მოძრაობის“ წევრები ნონა მამულაშვილი და თინა ბოკუჩავა აშშ-ს სახელმწიფო მდივნის მოადგილის თანაშემწე ერიკა ოლსონს ხვდებიან.
როგორც ნონა მამულაშვილმა ჟურნალისტებს განუცხადა, შეხვედრის მთავარი თემა გუშინ განვითარებული მოვლენები იქნება, მათ შორის, საქართველოს მესამე პრეზიდენტი მიხეილ სააკაშვილის „გატაცება“.
„მიმდინარე გეოპოლიტიკური მდგომარეობა რეგიონში არის ძალიან საგანგაშო, რა თქმა უნდა, ჩვენი პარტნიორები არიან შეწუხებულები „ქართული ოცნების“ ამ მიმართულებით და ვფიქრობ, რომ ეს იქნება ერთ-ერთი საკითხი, რაზეც აუცილებლად ვისაუბრებთ. აუცილებლად ვისაუბრებთ გუშინდელ ქმედებაზე, კონკრეტულად მიხეილ სააკაშვილის გატაცების თაობაზე. ეს იყო წარმოუდგენელი, რომ „ქართულმა ოცნებამ“, ჩვეულებრივმა ტერორისტებმა, გაიტაცეს საქართველოს მესამე პრეზიდენტი ისე, რომ ამის შესახებ არავინ იცოდა. ვისაუბრებთ არჩევნებზე და იმ მომავალზე, რაც საქართველოს ელის იმ შემთხვევაში, თუ ჩვენი დასავლელი პარტნიორები დროზე არ მიხედავენ ქვეყანაში მიმდინარე მდგომარეობას და „ქართული ოცნების“ ღია პრორუსული პოლიტიკის გამო არ გამოთქვამენ თავის პოზიციებს. მე ვთვლი, რომ „ქართული ოცნება“ ღალატობს საქართველოს ინტერესებს და ამის შესახებ ვაპირებ, რომ ჩვენ დასავლელ პარტნიორებთან ღიად ვისაუბრო“, - განაცხადა მამულაშვილმა.