თსუ-ში მაღალრეიტინგული პირველსემესტრელები დააჯილდოვეს

თბილისის სახელმწიფო უნივერსიტეტის შვიდივე ფაკულტეტზე ერთიანი ეროვნული გამოცდების შედეგად ჩარიცხული ბაკალავრიატის და მაგისტრატურის ყველაზე მაღალრეიტინგული პირველსემესტრელი სტუდენტები თბილისის სახელმწიფო უნივერსიტეტის რექტორმა გიორგი შარვაშიძემ და ფაკულტეტების დეკანებმა პლანშეტებითა და სერტიფიკატებით დააჯილდოვეს.

თბილისის სახელმწიფო უნივერსიტეტის ინფორმაციით, თსუ-ს რექტორმა სტუდენტებს მადლობა გადაუხადა თბილისის სახელმწიფო უნივერსიტეტის არჩევისთვის, წარმატებები უსურვა და იმედი გამოთქვა, რომ კორონავირუსის პანდემია მალე დასრულდება, სტუდენტები კი სააუდიტორიო მეცადინეობებს დაუბრუნდებიან.

2021 წელს, საქართველოს მასშტაბით არასახელოვნებო პროგრამებზე ჩარიცხულ სტუდენტებს შორის რეიტინგით პირველი მარიამ შენგელია თსუ-ს ზუსტ და საბუნებისმეტყველო მეცნიერებათა ფაკულტეტის ფიზიკის მიმართულების სტუდენტია. როგორც მან აღნიშნა, სასიხარულია, რომ უნივერსიტეტი მოტივაციას აძლევს პირველსემესტრელებს.

„დარწმუნებული ვარ, რომ თსუ-ში ჩაბარება კარგი გადაწყვეტილებაა. დღეს უნივერსიტეტმა სიმბოლური საჩუქრები გადმოგვცა, რაც ჩემთვის სიურპრიზი იყო. გამიხარდა რექტორის და დეკანების გაცნობა და მიხარია, რომ უნივერსიტეტი ასეთ მოტივაციას აძლევს პირველსემესტრელებს,“- აღნიშნა მარიამ შენგელიამ.

უნივერსიტეტის ინფორმაციით, ჰუმანიტარულ მეცნიერებათა ფაკულტეტის მაგისტრატურის საფეხურის ყველაზე მაღალრეიტინგული პირველსემესტრელი სტუდენტი ნინო გეგენავა გახდა, რომელიც ოთხი წლის წინ ბაკალავრებს შორისაც ფაკულტეტზე პირველ ადგილს იკავებდა. ნინო სწავლას მაგისტრატურის საფეხურზე თარგმანთმოცდნეობისა და კულტურათაშორისი ურთიერთობების მიმართულებით განაგრძობს.

„პირველ რიგში, ძალიან კმაყოფილი ვარ იმით, რომ ამდენი ხნის შემდეგ, დავბრუნდი უნივერსიტეტში, მენატრებოდა და ბედნიერი ვარ, რომ აქ ვარ, აკადემიურ სივრცეში. მოხარული ვარ იმ ფაქტით, რომ ჩემი შრომა, რომელიც ჩავდე ამ გამოცდისთვის მზადებაში, დაფასდა. ჩემი მოლოდინები ფაკულტეტთან დაკავშირებით, საბაკალავრო პერიოდმა უკვე გაამართლა და დარწმუნებული ვარ, რომ სამაგისტრო პროგრამაც ამჟამინდელ მოლოდინებს გაამართლებს,“- აღნიშნა ნინო გეგენავამ.

თბილისის სახელმწიფო უნივერსიტეტის ინფორმაციით, ერთიანი ეროვნული გამოცდების შედეგად, წელს თსუ-ში 5 200 აბიტურიენტი ჩაირიცხა. ქვეყნის მასშტაბით, ყოველი მესამე გრანტოსანი თბილისის სახელმწიფო უნივერსიტეტის სტუდენტია. თსუ-ში სწავლების სამივე საფეხურზე 240-მდე აკრედიტებული პროგრამა მოქმედებს. უნივერსიტეტის 7 ფაკულტეტზე 22 ათასზე მეტი სტუდენტი სწავლობს.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს