მიხეილ სააკაშვილს სჭირდება სამედიცინო დახმარება, როგორ შეიძლება ადამიანი გაიგზავნოს ჩვეულებრივ სასჯელაღსრულების დაწესებულებაში, რომელსაც არ აქვს არანაირი სამედიცინო აღჭურვილობა?! - ეს შეუძლებელია,- ამის შესახებ უკრაინის რადას დეპუტატმა ლიზა იასკომ გლდანის #18 სასჯელაღსრულების დაწესებულებასთან ჟურნალისტებს განუცხადა.

მისივე თქმით, ის უკვე მეოთხე დღეა მიხეილ სააკაშვილის მონახულების უფლებას ელის, თუმცა მას პასუხობენ, რომ ნებართვის შემცველი დოკუმენტები, რომლებიც იუსტიციის სამინისტროდან საპატიმროში უნდა გაიგზავნოს, დამუშავების პროცესშია.

„მე დარწმუნებული ვარ, რომ, პირველ რიგში, მას სჭირდება სამედიცინო დახმარება, მაღალტექნოლოგიური სამედიცინო დახმარება. ეს ძალიან ცხადია, ეს იყო სტრასბურგის სასამართლოს გადაწყვეტილებაში. რა თქმა უნდა, მას სჭირდება სამედიცინო დახმარება, როგორ შეიძლება ადამიანი გაიგზავნოს ჩვეულებრივ სასჯელაღსრულების დაწესებულებაში, რომელსაც არ აქვს არანაირი სამედიცინო აღჭურვილობა?! ეს შეუძლებელია და ეწინააღმდეგება ადამიანის უფლებების დაცვის სტანდარტებს.

ასევე მინდა აღვნიშნო, რომ მე აქ ვარ უკვე მეოთხე დღეა და ველოდები როდის მივიღებ საბუთებს იმისთვის, რომ მიშას ნახვა შევძლო და ისინი ჯერ კიდევ მეუბნებიან, რომ პროცესი მიმდინარეობს. მე არ ვიცი რა ვიფიქრო, ვფიქრობ ეს, ასევე, ჩემი უფლებების დარღვევაა, მისი უფლებების დარღვევაა. რამდენი ხანი უნდა ვიცადო ? და რატომ უნდა ვიცადო ? რატომ არ იყო ეს აქამდე პრობლემა და ახლა პრობლემა გახდა?“- განაცხადა ლიზა იასკომ.