მიმდინარე წლის 11 ნოემბერს, ვეტერანების საქმეთა სახელმწიფო სამსახურის სამართლებრივი უზრუნველყოფის დეპარტამენტის უფროსი, მიხეილ ხურციძე, რეგიონებში ვიზიტის ფარგლებში, სამსახურის რეგიონული მართვის დეპარტამენტის აჭარის ა/რ სამმართველოს უფროსთან, შუქრი ყიფიანთან და გურიის სამმართველოს უფროსთან, გელა ბაქანიძესთან ერთად, ოზურგეთისა და ჩოხატაურის მუნიციპალიტეტებში მცხოვრებ ვეტერანებს შეხვდა, - ამის შესახებ ინფორმაციას ვეტერანების საქმეთა სახელმწიფო სამსახური ავრცელებს.

მათივე ცნობით, ადგილობრივმა ვეტერანებმა ისაუბრეს სახელმწიფოსა და მუნიციპალიტეტების მიერ შემუშავებულ ერთობლივ პროგრამებზე, რომელთაც სამსახურის ბენეფიციართა წინაშე არსებული გამოწვევების დასაძლევად სჭირდება ეტაპობრივი განვითარება.

ამასთან, საუბარი შეეხო არასასოფლო-სამეურნეო მიწების დაკანონების, ქონების გადაფორმებისა და ომისა და თავდაცვის ძალების ვეტერანის სტატუსის მინიჭების საკითხებს. სამსახურის სამართლებრივი უზრუნველყოფის დეპარტამენტის უფროსმა, ვეტერანებს, მათ წინაშე არსებული სამართლებრივი საკითხების გადაჭრაში, კანონით განსაზღვრული უფლებამოსილების ფარგლებში, თანადგომა აღუთქვა.

„ვეტერანების საქმეთა სახელმწიფო სამსახური, ადგილობრივ მუნიციპალიტეტებთან ერთად, კვლავ განაგრძობს ერთობლივ მუშაობას ვეტერანთა სოციალური, ეკონომიკური და სამართლებრივი კუთხით არსებული გამოწვევების დასაძლევად“, - ნათქვამია ინფორმაციაში.