ეს იყო პირველი შემთხვევა, როდესაც ჩვენ ვერ მოვხვდით პაციენტთან, სხვა დროს ყოველთვის შევდიოდით, კონკრეტულად დღეს რატომ გვითხრეს უარი ჩემთვის უცნობია, - ამის შესახებ მიხეილ სააკაშვილის ჯანმრთელობის მდგომარეობასთან დაკავშირებით შექმნილი კონსილიუმის წევრმა, ექიმმა - ჰემატოლოგმა ნინო შარაშენიძემ გლდანის მერვე პენიტენციურ დაწესებულებასთან განაცხადა.

,,ჩვენთვის არ არსებობს არავითარი პოლიტიკური ნიშანი, არსებობს პაციენტი, რომელსაც თუ სჭირდება დახმარება, უნდა აღმოვუჩინოთ. შესაბამისად, კონსილიუმში მოხვედრის შემდეგ ჩვენი პოზიცია იყო, რომ გაგვეკეთებინა ყველაფერი ამ ადამიანის სიცოცხლის გადასარჩენად. სიმართლე გითხრათ, ეს იყო პირველი შემთხვევა, როდესაც ჩვენ ვერ მოვხვდით პაციენტთან, სხვა დროს ყოველთვის შევდიოდით, კონკრეტულად დღეს რატომ გვითხრეს უარი ჩემთვის უცნობია“, - განაცხადა ნინო შარაშენიძემ.

ცნობისთვის, საქართველოს მესამე პრეზიდენტის მიხეილ სააკაშვილის ადვოკატის შოთა თუთბერიძის ინფორმაციით, კონსილიუმის წევრებს გლდანის ციხის სამკურანლო დაწესებულებაში შესვლაზე უარი ეთქვათ. შოთა თუთბერიძის თქმით, მიზეზად პენიტენციურმა სამსახურმა სამუშაო საათების ამოწურვა დაასახელა.