ადამიანი თუ ჯანმრთელია, უნდა მოიყვანონ სასამართლო სხდომაზე, თუ ავად არის, სამედიცინო დაწესებულებაში უნდა გადაიყვანონ, - ამის შესახებ დიდი ოდენობით საბიუჯეტო თანხების გაფლანგვაში ბრალდებულმა, სახელმწიფო დაცვის სპეციალური სამსახურის ყოფილმა უფროსმა, თეიმურაზ ჯანაშიამ განაცხადა.
ის აღნიშნულ საქმეში საქართველოს ყოფილ პრეზიდენტთან მიხეილ სააკაშვილთან ერთადაა ბრალდებული. როგორც ჯანაშია განმარტავს, მიხეილ სააკაშვილს სასამართლო პროცესზე დასწრების საშუალება უნდა მისცენ.
„ამ წლების განმავლობაში „ქართული ოცნება" თავის ამომრჩეველს პირდებოდა, რომ მიხეილ სააკაშვილი სასამართლოს წინაშე წარდგებოდა. აგერ არის სასამართლო, მოიყვანონ და წარდგება. ის ფაქტი, რომ ამდენი ხანია სასამართლო პროცესები მიმდინარეობს, ისედაც ეჭვებს ბადებს, რამდენად ობიექტურადაა გამოძიებული",- განაცხადა ჯანაშიამ.
ცნობისთვის, საქალაქო სასამართლოში თანხების გაფლანგვის საქმეზე სასამართლო პროცესი მიხეილ სააკაშვილის გარეშე მიმდინარეობს, რადგან პენიტენციურმა სამსახურმა მის სასამართლოში გადაყვანაზე კვლავ უარი თქვა.