ოპოზიციის მხრიდან დღეს დაგეგმილი აქტივობები არის პირდაპირი მცდელობა, პოლიტიკური მარცხიდან ყურადღება მიხეილ სააკაშვილის ჯანმრთელობის მდგომარეობაზე, მისი შიმშილობის სტატუსზე გადაიტანონ , - ამის შესახებ „ქართული ოცნების“ ერთ-ერთმა ლიდერმა, არჩილ თალაკვაძემ ჟურნალისტებს „ნაციონალური მოძრაობის“ მიერ დღეს ორგანიზებულ აქციასთან დაკავშირებით განუცხადა.
მისი თქმით, ეს პოლიტიკური უპასუხისმგებლობაა.
„ეს არის პოლიტიკური უპასუხისმგებლობა, როდესაც „ნაციონალური მოძრაობის“ ბანაკს არ შეუძლია არჩევნებში დამარცხების შემდეგ, მარცხი აღიაროს და თავის მხარდამჭერებს სიმართლე უთხრას. ისინი ასე იქცეოდნენ საპარლამენტო არჩევნების შემდეგაც, 7 თვის განმავლობაში და ბოლოს, როგორც ვნახეთ, შემოვიდნენ პარლამენტში და დავასრულეთ პარლამენტის წინააღმდეგ ხელოვნური საბოტაჟი. დღესაც გვაქვს მსგავს პროცესთან საქმე“ ,- განაცხადა თალაკვაძემ.
მან პოლიტიკურ ლიდერებს მოუწოდა, გაითვალისწინონ პანდემია და საავტომობილო მოძრაობას ნუ შეაფერხებენ.
„პროვოკაციულ ნაბიჯს ნუ გადადგამენ, ნუ მიიღებენ ისეთ გადაწყვეტილებებს, რომელიც ჩვენი მოქალაქეების ჯანმრთელობისა და უსაფრთხოების ინტერესებს ეწინააღმდეგება“, - განაცხადა თალაკვაძემ.