ხატია წილოსანმა პლასტმასის ნარჩენების პრევენციის ეროვნული პროგრამის პრეზენტაციაში მიიღო მონაწილეობა

გარემოს დაცვისა და ბუნებრივი რესურსების კომიტეტის თავმჯდომარის პირველმა მოადგილემ, ხატია წილოსანმა მონაწილეობა მიიღო კონფერენციაში, სადაც პლასტმასის ნარჩენების პრევენციის ეროვნული პროგრამის პრეზენტაცია გაიმართა, - ამის შესახებ „ინტერპრესნიუსს“ პარლამენტიდან აცნობეს.

პროგრამა და სამოქმედო გეგმა გარემოს დაცვისა და სოფლის მეურნეობის სამინისტრომ და კავკასიის გარემოსდაცვითი არასამთავრობო ორგანიზაციების ქსელმა (CENN) წარადგინეს, ნორვეგიის საგარეო საქმეთა სამინისტროს მხარდაჭერით.

დოკუმენტი მოიცავს 10-წლიან სტრატეგიას და 5 წლიან სამოქმედო გეგმას, სადაც გამოკვეთილია მიზნები და ღონისძიებები, რომელთა შესრულებაც ხელს შეუწყობს ადამიანის ჯანმრთელობასა და გარემოზე პლასტმასის ნარჩენებით მიღებული ზიანის პრევენციას.

„პლასტიკის ნარჩენების შემცირება ყველა ჩვენგანის ვალია და იმედი მაქვს, რომ ეს ათწლიანი სტრატეგია და მისი სამოქმედო გეგმა, შესაძლებლობას მოგვცემს, მომავალში უკეთესი გარემო შევქმნათ. ეს ყველაფერი, რა თქმა უნდა, კავშირშია კლიმატის ცვლილებებთან დაკავშირებული ნეგატიური მოვლენების შემცირებასთან და საქართველო ძალიან ამაყობს, რომ არის ამ პროცესის მონაწილე.

როდესაც ვსაუბრობთ ნარჩენების მართვაზე, პლასტიკის ნარჩენების შემცირებაზე, ეს არის თითოეული ჩვენგანის საქმე. ის გარემო, რომელშიც უნდა ვიცხოვროთ, ჩვენი შესაქმნელია, ამას არავინ გააკეთებს ჩვენ ნაცვლად და ყველა ადამიანი, რომელიც ჩართული იქნება ამ პროცესში, ძალიან დიდ წვლილს შეიტანს ქვეყნის განვითარებაში“, - განაცხადა კონფერენციაზე ხატია წილოსანმა.

კონფერენციაში მონაწილეობდნენ საქართველოს გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი, საქართველოში ნორვეგიის ელჩი ჰელენ სანდ ანდერსონი, გარემოს დაცვის სპეციალისტები და ექსპერტები.

კონფერენციის დარბაზში გამოფენილი იყო საქართველოში არსებული პლასტმასის ნარჩენების შემგროვებელი და გადამამუშავებელი კომპანიების ნაწარმის გამოფენა.

თენგიზ ფხალაძე - დღეს თამაშის დრო ნამდვილად არ არის, 12-ვე ვალდებულება უნდა შესრულდეს და არა შესრულების ილუზია შეიქმნას, კანდიდატობის ვერ მიღება მხოლოდ ჩვენს თავს უნდა დავაბრალოთ და სხვას არავის
ქართული პრესის მიმოხილვა 27.06.2022
უკრაინის დამოუკიდებელი ანტიკორუფციული კომისიის აღმასრულებელი დირექტორი - დრო ჩვენთვის სიცოცხლით იზომება, ჩვენ არც თუ ისე ტოლერანტულები ვართ ლოდინისადმი - ამ დროში ვკარგავთ ქვეყანას, რომელსაც რუსეთი წამებით კლავს
„სილქ როუდ ჯგუფი“ ბიზნესმენ ლევან კაჭარავას გარდაცვალებას ეხმაურება
პირველი კრიპტო POS-ტერმინალი საქართველოშია