კონსილიუმის წევრებმა, მიხეილ სააკაშვილის მდგომარეობის დეტალურად შესწავლისა და ჩატარებული კვლევების გაცნობის საფუძველზე შეაჯამეს საერთო მდგომარეობა და დღესვე დაწერენ დასკვნას, რომლის მიხედვითაც გორის სამხედრო ჰოსპიტალი იხელმძღვანელებს. ამის შესახებ ჟურნალისტებს გორის სამხედრო ჰოსპიტალთან კონსილიუმის წევრებმა განუცხადეს.

სწორედ კონსილიუმის აღნიშნული დასკვნის თანახმად გაგრძელდება მიხეილ სააკაშვილის მკურნალობა და რეაბილიტაცია.

როგორც კონსილიუმის წევრმა, ექიმმა ნინო შარაშენიძემ ჟურნალისტებს განუცხადა, პაციენტის მდგომარეობა უკეთესია. მისივე განმარტებით, შეაფასეს პაციენტის თერაპიული სტატუსი, დასახეს ლაბორატორიული კვლევების შემდგომი სქემა, შეიმუშავეს მკურნალობის ტაქტიკა, მედიკამენტები.

ამასთან, ნევროლოგი სანდრო ცისკარიძე იმედოვნებს, რომ ადეკვატური მკურნალობის ფონზე სააკაშვილის მდგომარეობა არ დამძიმდება. მისივე თქმით, ე.წ.რეფიდინგის პროტოკოლი შეთანხმებულია. რაც შეეხება პაციენტის ნევროლოგიურ სტატუსს, ცისკარიძის თქმით, გუშინდელთან შედარებით გარკვეული და პოზიტიური დინამიკა აღინიშნება.