მიხეილ ჩხენკელმა საქართველოს ზოგად განათლებაში ინგლისური ენის სწავლების სტრატეგიის პრეზენტაციაში მიიღო მონაწილეობა

საქართველოს განათლებისა და მეცნიერების სამინისტროს ინიციატივით, ბრიტანეთის საბჭომ საქართველოში ზოგად განათლებაში ინგლისური ენის სწავლების სტრატეგია შეიმუშავა, რომელიც ამ ენის სწავლების გაძლიერებასა და ინგლისური ენის მასწავლებლების პროფესიული განვითარების ხელშეწყობას ითვალისწინებს.

ინფორმაციას განათლებისა და მეცნიერების სამინისტრო ავრცელებს.

მათი ინფორმაციით, სტრატეგიული დოკუმენტის ონლაინ პრეზენტაციაში განათლებისა და მეცნიერების მინისტრმა მიხეილ ჩხენკელმა მიიღო მონაწილეობა და დამსწრე საზოგადოებას სიტყვით მიმართა.

როგორც უწყებაში აღნიშნავენ, მინისტრმა მადლობა გადაუხადა ბრიტანეთის ელჩსა და ბრიტანეთის საბჭოს საქართველოს განათლების სისტემის მხარდაჭერისათვის, წლების განმავლობაში ნაყოფიერი თანამშრომლობისთვის განათლების ყველა საფეხურზე.

მიხეილ ჩხენკელის თქმით, ძალიან მნიშვნელოვანია, მასწავლებელთა მხარდაჭერა ხარისხიანი განათლების სისტემის შესაქმნელად, მათ შორის, მათი პროფესიული განვითარების ხელშეწყობის მიმართულებით.

აღსანიშნავია, რომ ბრიტანეთის საბჭო საქართველოში მზადყოფნას გამოთქვამს მონაწილეობა მიიღოს სტრატეგიული დოკუმენტით გაწერილი ამოცანების შესრულებაში. მნიშვნელოვანია ისიც, რომ ზოგად განათლებაში ინგლისური ენის სწავლების სტრატეგია აისახა 2022-2032 წლების განათლებისა და მეცნიერების ერთიან ეროვნულ სტრატეგიაში.

ზოგად განათლებაში ინგლისური ენის სწავლების სტრატეგიის დოკუმენტი მოიცავს რეკომენდაციებს ზოგადი განათლების სისტემების რეფორმირებისა და ეფექტური ELT პრაქტიკის განვითარებისათვის, სამოქმედო გეგმას პირველი წლის განმავლობაში განსახორციელებელი ინტერვენციების შესახებ, რომელიც ხელს შეუწყობს სტრატეგიის წარმატებულ განხორციელებას. სტრატეგიის დოკუმენტის გრძელვადიანი მიზნის მიხედვით, 10 წელიწადში სკოლის დამთავრებისას ყველა მოსწავლე უნდა ფლობდეს ინგლისურ ენას B2 დონეზე, ხოლო ყველა მასწავლებელი - C1 დონეზე.

საქართველოს ზოგად განათლებაში ინგლისური ენის სწავლების სტრატეგიის პრეზენტაციაში მონაწილეობა მიიღეს ბრიტანეთის ელჩმა საქართველოში მარკ კლეიტონმა, განათლებისა და მეცნიერების მინისტრის პირველმა მოადგილემ ეკატერინე დგებუაძემ, ბრიტანეთის საბჭოს გენერალურმა დირექტორმა ზაზა ფურცელაძემ და განათლების ექსპერტებმა“, - აღნიშნულია ინფორმაციაში.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს