საგარეო ურთიერთობათა კომიტეტის თავმჯდომარე, ნიკოლოზ სამხარაძე „ახალი თაობა პლურალიზმისა და დემოკრატიისთვის" ფორუმის მონაწილეებს შეხვდა. შეხვედრა კითხვა პასუხის რეჟიმში მიმდინარეობდა. ამის შესახებ "ინტერპრესნიუსს" პარლამენტიდან აცნობეს.
ნიკოლოზ სამხარაძემ საქართველოს საგარეო პოლიტიკის პრიორიტეტებზე, ევროპულ და ევროატლანტიკურ სტრუქტურებში ჩვენი ქვეყნის ინტეგრაციასა და „საქართველოს საგარეო პოლიტიკის შესახებ" პარლამენტის რეზოლუციაზე ისაუბრა, რომელიც 2024 წელს ევროკავშირში გაწევრიანების შესახებ ოფიციალური განაცხადის გაკეთებას გულისხმობს.
საგარეო ურთიერთობათა კომიტეტის თავმჯდომარემ ხაზი გაუსვა საქართველოს ოკუპირებულ რეგიონებში არსებულ ვითარებას, რუსეთის უკანონო ქმედებებს და სტრასბურგის სასამართლოში საქართველოს მიერ რუსეთზე მოპოვებულ მნიშვნელოვან გამარჯვებას.
ფორუმის მონაწილეებთან შეხვედრაზე სამხრეთ კავკასიის რეგიონში მიმდინარე პროცესები და რეგიონული უსაფრთხოების საკითხები განიხილეს. ნიკოლოზ სამხარაძემ სამხრეთ კავკასიაში მშვიდობისა და სტაბილურობის დამყარებაში საქართველოს მნიშვნელოვან როლს გაუსვა ხაზი.