”ქართული ოცნების” ოფისთან პარტია „დროას” წევრები და სამოქალაქო აქტივისტები მივიდნენ. ისინი აჭარის მთავრობის თავმჯდომარის თორნიკე რიჟვაძის გადადგომას მოითხოვენ.

აქციის მონაწილეებმა ადგილზე განგაშის სირენა ჩართეს, რადგან მათი განცხადებით, ქვეყანაში საგანგაშო მდგომარეობაა. ამასთან, მათ ხელში უჭირავთ ბანერები წარწერით - ,,ქართული ოცნება კლავს”, „თორნიკე რიჟვაძე კლავს“.

მმართველი პარტიის ოფისთან სამართალდამცავები არიან მობილიზებულები, რომლებიც აქციის მონაწილეებს ოფისთან მისვლის უფლებას არ აძლევენ.

ცნობისთვის, "ნაციონალური მოძრაობის" განცხადებით, ბათუმის ახალი მოწვევის საკრებულოს წევრს „ერთიანი ნაციონალური მოძრაობიდან" ნუგზარ ფუტკარაძეს, რომელიც რამდენიმე დღის წინ გარდაიცვალა, თორნიკე რიჟვაძის მამის, დავით რიჟვაძის დავალებით, მოსყიდვის სანაცვლოდ 100 ათას დოლარს სთავაზობდნენ. როგორც პარტიის წევრი გიორგი კირთაძე აცხადებს, მათ შესაბამის მტკიცებულებად აუდიო ჩანაწერი აქვთ.