საზოგადოებრივი აზრი მოსამართლის გადაწყვეტილებაზე გავლენას არ უნდა ახდენდეს - მოსამართლემ შინაგანი რწმენაც კი, მხოლოდ მტკიცებულების საფუძველზე უნდა ჩამოიყალიბოს, - ამის შესახებ უზენაესი სასამართლოს მოსამართლის თანამდებობაზე წარდგენილმა გენადი მაკარიძემ პარლამენტის იურიდიულ საკითხთა კომიტეტის სხდომაზე მოსმენისას განაცხადა.
მაკარიძის თქმით, თუკი ისეთი მოსამართლეები გვეყოლება, ვინც გადაწყვეტილებას შექმნილი აჟიოტაჟის გამო მიიღებს, ასეთი გადაწყვეტილება სწორი არ იქნება. მან აქვე დასძინა ისიც, რომ შეიძლება საზოგადოებრივი აზრი იმ გადაწყვეტილებას ემთხვეოდეს, რომლის გამოტანასაც მოსამართლე აპირებს და ეს ვინმემ ისე არ უნდა გაიგოს რომ, რომ არა საზოგადოების აქტიურობა, მოსამართლე სხვა გადაწყვეტილებას მიიღებდა.
“შეიძლება რაღაც საკითხი საზოგადოების დიდი ჯგუფისთვის მიუღებელი იყოს, მაგრამ მოსამართლე ყოველთვის იმ კანონის ფარგლებში რჩება, რაც განსახილველ დავას ეხება. გადაწყვეტილებასაც იმ ფაქტებიდან გამომდინარე იღებს, რაც განსახილველ საქმეშია მოცემული. შეიძლება საქმე საზოგადოებრივად არ იყოს ცნობადი, პროცესს მხოლოდ მოსარჩელე და მოპასუხე ესწრებოდეს და საქმის მიმართ სხვას ინტერესი არ ჰქონდეს, მაგრამ მოსამართლემ როგორც არ უნდა შეხედოს, რომ ერთი მხარე მორალურად მართალია, ამაზე დაყრდნობით გადაწყვეტილება არ უნდა მიიღოს - მხოლოდ მტკიცებულებები! ის მტკიცებულებები, რაც მას საქმეში აქვს წარმოდგენილი“, - განაცხადა გენადი მაკარიძემ.