ფრაქცია "ლელო-პარტნიორობა საქართველოსთვის" წევრის ანა ნაცვლიშვილის შეფასებით, მიხეილ სააკაშვილის ინიციატივა მისი გათავისუფლების მიზნით საინიციატივო ჯგუფის შექმნის შესახებ პარტია "ნაციონალური მოძრაობის" მხარდამჭერებისკენ არის მიმართული.
როგორც ნაცვლიშვილმა აღნიშნა, მიხეილ სააკაშვილი, როგორც პარტიის დამფუძნებელი, საკუთარი პარტიის მხარდამჭერებს მიმართავს, რისი უფლებაც მას აქვს.
„მაშინ როდესაც ხელისუფლების მხრიდან სასწორზე შეგდებული იყო ადამიანის სიცოცხლე და ჯანმრთელობა და არსებობდა არა მხოლოდ მესამე პრეზიდენტის სიცოცხლესთან, არამედ პროცესების უკიდურეს სამოქალაქო დაპირისპირებაში გადაყვანის საფრთხეები, ამ დროს მომხდარი კონსოლიდაცია ერთადერთი სწორი, ბუნებრივი და ჯანსაღი პოზიცია იყო. ეს დღეები ჩემთვის და „ლელოსთვის“ პოლიტიკური ბრძოლა არ ყოფილა - ეს იყო ღირებულებითი ბრძოლა ადამიანის სიცოცხლისთვის და საზოგადოებაში ჰუმანურობის ხელშესაწყობად და გადასარჩენად. რაც შეეხება პოლიტიკური ბრძოლის სტრატეგიასა და ტაქტიკას, ეს ყველას ჩვენ ჩვენი გვაქვს - ჩვენ ჩვენი შეხედულებები გვაქვს და ახლა ჩვენთვის პრიორიტეტულია საკითხი, თუ როგორ შეიცვალოს საარჩევნო სისტემა, რომ ვადამდელ არჩევნებს შინაარსი და დატვირთვა ჰქონდეს. ამის გზა და ფორმა საკონსტიტუციო ცვლილებებია - ახლა მთავარი ამოცანაა, საარჩევნო სისტემის მიღწევა, რომლის ირგვლივაც საჭიროა ფართო კონსესუსი", - განაცხადა ანა ნაცვლიშვილმა.