ერთმანეთისკენ ხელის გაშვერით ცდილობენ, აბრაკადაბრა შექმნან, თითქოს, ვერ გაერკვნენ, როგორ უნდა მოხდეს გორის ჰოსპიტალში დეპუტატების შეშვება, - ამის შესახებ საქართველოს ყოფილი პრეზიდენტის ადვოკატმა ბექა ბასილაიამ გორის ჰოსპიტალთან განაცხადა.

ბასილაიას განცხადებით, მიხეილ სააკაშვილი არის პოლიტიკურ იზოლაციაში.

„მე-12 დაწესებულებაში, მე-18 დაწესებულებაში, ასევე ნებისმიერ სხვა ვითარებაში, დეპუტატებს მიხეილ სააკაშვილთან ან სხვა ნებისმიერ პატიმართან ეძლევათ საშუალება, რომ მოინახულონ. რას ვხედავთ დღეს - დღეს ვხედავთ, რომ გორის ჰოსპიტალში საქართველოს მესამე პრეზიდენტს არ ახვედრებენ საქართველოს პარლამენტის წევრებს, ქმნიან ხელოვნურ დაბრკოლებებს და ამაზე პასუხისმგებელია პარლამენტის თავმჯდომარე, პასუხისმგებელია პენიტენციური სამსახური და ერთმანეთისკენ ხელის გაშვერით ცდილობენ აბრაკადაბრა შექმნან, თითქოს, ვერ გაერკვნენ, როგორ უნდა მოხდეს გორის ჰოსპიტალში დეპუტატების შეშვება. სინამდვილეში კი საკითხი დგას ძალიან მარტივად - დეპუტატებს აქვთ სრული კანონიერი უფლება, მოთხოვნის შემთხვევაში შეხვდნენ მიხეილ სააკაშვილს. ამას რომ არ აკეთებს ხელისუფლება, ეს ნიშნავს, რომ მიხეილ სააკაშვილი არის პოლიტიკურ იზოლაციაში. ჩვენ მოვისმინეთ მიხეილ სააკაშვილის გუშინდელი განცხადება, ჩვენთვის ძალიან მნიშვნელოვანია, გადამწყვეტი მნიშვნელობა აქვს მისი ჯანმრთელობის მდგომარეობას, მის სიცოცხლეს, აქედან გამომდინარე, ვიმედოვნებთ, რომ ეს საკითხი ამოიწურება იმგვარად, რომ მიხეილ სააკაშვილის ჯანმრთელობის მდგომარეობა კიდევ ერთხელ არ დამძიმდეს“, - განაცხადა ბექა ბასილაიამ.