ხვალ-ზეგ პარტიის თავმჯდომარე გააკეთებს ღია ინიციატივას, რომელიც მიმართული იქნება ჩვენი პოლიტიკური პარტნიორების მიმართ - ბრძოლა იქნება ყველა მიმართულებით, კანონიერი, კონსტიტუციის ფარგლებში ჩამჯდარი ყველა მეთოდით, - ამის შესახებ „ერთიანი ნაციონალური მოძრაობის“ ერთ-ერთმა ლიდერმა, ბაჩო დოლიძემ „პალიტრანიუსის“ გადაცემაში „360 გრადუსი“ განაცხადა.

ოპოზიციონერი პოლიტიკოსი ფიქრობს, რომ მათ მიერ გაჟღერებული ინიციატივა მისაღები იქნება სხვა ოპოზიციური პარტიებისთვის.

როგორც დოლიძემ აღნიშნა, ასევე მნიშვნელოვანია, რომ ეს გასაგები იყოს საერთაშორისო პარტნიორებისთვის.

„ხვალ-ზეგ პარტიის თავმჯდომარე, ამ შემთხვევაში ნიკა, გააკეთებს ღია ინიციატივას, ამის შესახებ საჯაროდ გახდება ცნობილი, რომელიც დაიდება. ეს ინიციატივა მიმართული იქნება ჩვენი პოლიტიკური პარტნიორების მიმართ, - ეს იქნება ჩვენი ხედვა, როგორ წარმოგვიდგენია ზოგადად ხვალინდელი და ზეგინდელი დღე. კომპლექსური იქნება, ბრძოლა იქნება აბსოლუტურად ყველა მიმართულებით, კანონიერი, კონსტიტუციის ფარგლებში ჩამჯდარი ყველა მეთოდით, რომელიც ადეკვატურია იმ რეალობასთან, რაც დღეს არის ქვეყანაში. ეს ჩვენი ხედვა, დარწმუნებული ვარ, მისაღები იქნება როგორც პოლიტიკური პარტიებისთვის, ასევე აბსოლუტურად გასაგები უნდა იყოს ჩვენი საერთაშორისო პარტნიორებისთვის. ჩვენ ფეხებზე ვერ დავიკიდებთ ვერც საერთაშორისო პარტნიორებს, ვერც აშშ-ს, ვერც ევროპას და ვერც ბრიუსელს, როგორც ამას აკეთებს „ქართული ოცნება,“ არაერთი თავისი ქმედებით, თუ განცხადებით“, - განაცხადა ბაჩო დოლიძემ.