პარლამენტის პლენარულ სხდომაზე, დეპუტატებმა ტყიბულში მომხდარი ტრაგედიის შედეგად დაღუპულთა ოჯახებს სამძიმარი გამოუცხადეს.

როგორც ფრაქცია „ქართული ოცნების“ წარმომადგენელმა, ბეჟან წაქაძემ აღნიშნა, ტყიბულში, ქვანახშირის მოპოვების დროს 2 ადამიანი დაიღუპა, ვიტალი ტურძილაძე და ავთანდილ არსენიძე.

„მიუხედავად იმისა, რომ ძალიან ბევრი ღონისძიება გატარდა უკანონო მოპოვების კუთხით, იგი კვლავაც ხდება და , სამწუხაროდ, ადამიანებს იწირავს. მინდა, მოვუწოდო შესაბამის სამსახურებს, რომ კიდევ უფრო გაძლიერდეს კონტროლი ამ მიმართულებით, რათა არ მოხდეს მსგავსი ტრაგედიები“, - განაცხადა ბეჟან წაქაძემ.

შემთხვევა ტყიბულში 27 ნოემბერს მოხდა. ნახშირის ღია მოპოვების კარიერზე მიწის მასაში ორი ადამიანი მოყვა. მომხდარზე გამოძიება 240-ე მუხლით დაიწყო.