მიხეილ სააკაშვილი დღეს პოლიტიკური პატიმარია და ის პოლიტიკური შურისძიების მსხვერპლია, - ამის შესახებ „ნაციონალური მოძრაობის“ ერთ-ერთმა ლიდერმა, ზაალ უდუმაშვილმა „პალიტრანიუსის“ გადაცემაში „360 გრადუსი“ განაცხადა.

მისი თქმით, მიხეილ სააკაშვილი ჩვეულებრივი პატიმარი არ არის, რადგან ის საქართველოს მესამე პრეზიდენტია.

„მანახეთ ადამიანი საქართველოში, ვინც ენდობა ბიძინა ივანიშვილის სასამართლოს, ვინც თვლის, სასამართლოში რომ მივა, იქ სამართალს იპოვის. მიხეილ სააკაშვილი არ არის ჩვეულებრივი პატიმარი, მიხეილ სააკაშვილი არის საქართველოს მესამე პრეზიდენტი და ბუნებრივია, ის დღეს პოლიტიკური პატიმარია და ის პოლიტიკური შურისძიების მსხვერპლია. ჩვენ ხომ ვნახეთ ის კადრები, როგორც ეპყრობოდნენ მიხეილ სააკაშვილს, ამის გამართლება რაიმე ფორმით შესაძლებელია? და ამის შემდეგ ჩვენ იმედი გვაქვს, რომ სასამართლო გამოიტანს ობიექტურ გადაწყვეტილებას?! ჩვენ სამართლიან სასამართლოს ვითხოვთ“, - განაცხადა უდუმაშვილმა.

ზაალ უდუმაშვილმა ასევე ისაუბრა უმრავლესობის ლიდერის, „ქართული ოცნების“ თავმჯდომარის ირაკლი კობახიძის განცხადების თაობაზეც, რომლის თანახმადაც საკონსტიტუციო ცვლილებების მიღება, დამოკიდებული იქნება ოპოზიციის ქმედებებზე და განაცხადა, რომ „ნაციონალურ მოძრაობას“ თავისი ბრძოლის ტაქტიკა აქვს.

„კობახიძეს უნდა, მაგრამ ვერ შევალ პარლამენტში და ვერ დავუჯდები, კარგი მოსწავლესავით. ჩვენ ჩვენი ბრძოლის ტაქტიკა გვაქვს და კეთილი ინებოს კობახიძემ და შეასრულოს ის ვალდებულებები, რომელიც მას აღებული აქვს საერთაშორისო პარტნიორების წინაშე“, - განაცხადა ზაალ უდუმაშვილმა.