სასამართლო პროცესის მიმართ არ არსებობს ნდობა, არც საერთაშორისო პარტნიორებში და არც ქვეყნის შიგნით, ეს არის ერთგვარი შოუ, რომელიც ხელისუფლების მხრიდან დადგმულია პოლიტიკური ოპონენტების წინააღმდეგ,- ამის შესახებ ჟურნალისტებთან ოპოზიციონერმა დეპუტატმა სალომე სამადაშვილმა მიხეილ სააკაშვილის დღევანდელ სასამართლო პროცესთან დაკავშირებით განაცხადა.
მისივე თქმით, იმ პირობებში, როცა ქვეყანაში დამოუკიდებელი სასამართლო არ არსებობს, პროკურატურა კი გადაქცეულია პოლიტიკური დევნის ინსტრუმენტად, ამ სასამართლო პროცესის მიმართ ნდობა ვერ იქნება.
"კარგია, რომ მიხეილ სააკაშვილს შესაძლებლობა ეძლევა გამოიყენოს ეს სხდომა იმისთვის, რომ საკუთარი პოზიცია დააფიქსიროს საზოგადოების წინაშე, თუმცა მინდა, ყველას შევახსენო, რომ საკუთარ სასამართლოზე დასწრების კონსტიტუციური უფლებაც კი, სააკაშვილმა მოიპოვა მხოლოდ საერთაშორისო წნეხის შედეგად, რაც უკვე მაჩვენებელია იმის, თუ სად არის ხელისუფლება, კანონის უზენაესობა, ადამიანების უფლებების დაცვა, მათ შორის, მიხეილ სააკაშვილის უფლებები. არ მიმაჩნია, რომ სახელმწიფო ან პოლიტიკური თანამდებობა არის იმუნიტეტი ვინმესთვის, ჩემთვის ან ნებისმიერი სხვა ადამიანისთვის. პრობლემა არის იმაში, რომ ქვეყანაში არ არსებობს კანონის უზენაესობა, შერჩევითია სამართალი და პოლიტიკური მართლმსაჯულებაა, რომელსაც ხელისუფლება იყენებს იმ პოლიტიკური ოპონენტების წინააღმდეგ, ვისაც საჭიროდ თვლის, რომ სამართლებრივად შეავიწროვოს. ამ პირობებში ბრლადების შინაარსს მნიშვნელობა ეკარგება და არანაირი შინაარსი არ აქვს,"- განაცხადა სამადაშვილმა.