პრეზიდენტი გისოსებს უკან, ამის ყურება არ არის მარტივი - ქვეყანაში პრეზიდენტობა საშიშია. ვნახეთ, რა მოუვიდა პირველ პრეზიდენტს, მეორეს, მესამეს. ზოგადად, ეს ჩვენზე კარგად არ მეტყველებს, რომ ამ მოკლე პერიოდში ყველაზე მაღალი თანამდებობის პირების ბედი ასეთია, - ამის შესახებ პოლიტიკის ექსპერტმა, ლაშა ტუღუშმა „პალიტრანიუსის“ გადაცემაში „360 გრადუსი“ განაცხადა.

მისი თქმით, ზოგადად ყოფილი პრეზიდენტის, მიხეილ სააკაშვილის ხილვა უკეთესი იქნებოდა სამართლიან სასამართლოში.

„ჩემთვის მისი [სააკაშვილის] გამოსვლა იყო საინტერესო, დიდი ხანია ჩვენ არ მოგვისმენია მისთვის. მიუხედავად იმისა, რომ მის მიმართ ყოველთვის კრიტიკული ვიყავი, პრეზიდენტი გისოსებს უკან, ამის ყურება არ არის მარტივი. მე არ ვამბობ გათავისუფლებას, სააკაშვილი წარმომიდგენია საუკეთესო ვითარებაში, ნორმალურ სასამართლოში. საერთოდ, მერჩივნა, რომ ზოგადად პრეზიდენტები არ გვეჯდეს ციხეში, - არ ვკლავდეთ პრეზიდენტს, მეორეს არ ვაგდებდეთ ტრიბუნიდან, მესამეს არ ვიჭერდეთ, მეოთხეს სახლიდან არ ვაძევებდეთ. ციხე არ მთავრდება ამ ქვეყანაში. პრეზიდენტობა საშიშია ქვეყანაში. ვნახეთ რა მოუვიდა პირველ პრეზიდენტს, მეორეს, მესამეს. ზოგადად, ეს ჩვენზე კარგად არ მეტყველებს, რომ ამ მოკლე პერიოდში ყველაზე მაღალი თანამდებობის პირების ბედი ასეთია“, - განაცხადა ლაშა ტუღუშმა.