საქმეზე დადგენილია ყველა ის პირი, ვინც რაიმე ფორმით ეხმარებოდა ბრალდებულ მიხეილ სააკაშვილს - ბრალდებულს სახელმწიფო საზღვრის გადმოკვეთაში ეხმარებოდა წინა ხელისუფლების, ძალოვანი სტრუქტურის მაღალჩინოსანი, - ამის შესახებ ყოფილი პრეზიდენტის, მიხეილ სააკაშვილის საქმის პროკურორმა, ლევან ვეფხვაძემ სასამართლო სხდომის დასრულების შემდეგ ჟურნალისტებს განუცხადა.

როგორც პროკურორმა აღნიშნა, გაუგებარია რას დავობს დაცვის მხარე, რადგან, ვეფხვაძის განმარტებით, საზღვრის უკანონო კვეთა დანაშაულია.

„დღევანდელ სასამართლო პროცესზე, საქმე გადაეცა არსებით განსახილველად, თუმცა, ჩემი მოლოდინი არ გამართლდა, რადგან დაცვის მხარემ სადავოდ გახადა მტკიცებულება, თუმცა, რას დავობს, აბსოლუტურად გაუგებარია იმიტომ, რომ ბრალდებულ მიხეილ სააკაშვილს, უკრაინის მოქალაქეს ოფიციალურად არ გადმოულახავს საქართველოს სახელწიფო საზღვარი და ის იმყოფება საქართველოში - საზღვრის უკანონო კვეთა დანაშაულია. რაც შეეხება სხვა ფაქტობრივ გარემოებებს, აღნიშნულ საქმეზე დადგენილია ყველა ის პირი, ვინც რაიმე ფორმით ეხმარებოდა ბრალდებულ მიხეილ სააკაშვილს ჯერ უკრაინის სახელმწიფო საზღვრის გადმოკვეთას, შემდეგ საქართველოს სახელმწიფო საზღვრის უკანონო გადაკვეთაში. შესაბამისად, საგამოძიებო-საპროცესო მოქმედებების სრულად ამოწურვის შემდეგ, მიღებული იქნება შემაჯამებელი გადაწყვეტილება. ბრალდებულ მიხეილ სააკაშვილის სახელმწიფო საზღვრის გადმოკვეთაში ეხმარებოდა წინა ხელისუფლების, ძალოვანი სტრუქტურის მაღალჩინოსანი. რაც შეეხება კონკრეტულ ვინაობას და სხვა ფაქტობრივ გარემოებებს, ბრალდების მხარე მტკიცებულებების ანალიზის საფუძველზე, შემაჯამებელ გადაწყვეტილებას მიიღებს, - ვინ მიეცემა პასუხისგებაში ან რა მუხლით მიეცემა პასუხისგებაში“, - განაცხადა პროკურორმა.