მე ვფიქრობ, რომ ჩვენ ვხედავთ ძალიან ბუნებრივ პროცესს, რომელიც დასრულდება ხელისუფლების ჩამოშლით საბოლოო ჯამში. „ქართული ოცნება" უკვე დიდი ხანია დაემსგავსა მითიურ არსებას, რომელიც საკუთარ ხორცს ჭამს და ამით იკვებება და ეს დიდხანს ვერ გაგრძელდება , - ასე გამოეხმაურა ოპოზიციონერი დეპუტატი სალომე სამადაშვილი „პალიტრანიუსის“ გადაცემაში „თავისუფალი სტუდია“ ეკატერინე ტიკარაძის მიერ ჯანდაცვის მინისტრის თანამდებობის დატოვებას.

მისი თქმით, მმართველ გუნდში დაპირისპირებაა და „ერთმანეთს დაერია პოლიტიკური შემადგენლობა, რომელიც დღეს ქვეყანას მართავს ბიძინა ივანიშვილის სახელით“.

„მიხეილ სააკაშვილის თემამ რეალურად გადაიტანა პოლიტიკური დღის წესრიგი სხვა საკითხებზე, მაგრამ რეალურად, რომ შევხედოთ რა ვითარებაშია დღეს ქვეყანა, ჩვენ მსოფლიოში ყველაზე უარესი მაჩვენებელი გვაქვს. პანდემიის გავრცელებით მეოთხე ადგილზე ვართ მსოფლიოში, ხოლო რაც შეეხება სიკვდილიანობას, ვართ მეოთხე ადგილზე. ასევე, ინფლაციას ისტორიული რეკორდი აქვს მოხსნილი. ჩვენ ვართ ვითარებაში, როდესაც ფიზიკურად დაუცველი ვართ ვირუსის წინაშე, ეკონომიკურად განადგურებულია ჩვენი პერსპექტივები და ადამიანები უმძიმეს მდგომარეობაში არიან.

პოლიტიკურ კონტექსტს ვხედავთ, ყოფილი პრეზიდენტი ციხეში, სხვა პოლიტიკური ლიდერების წინააღმდეგ დევნა, დასავლეთი უფრო და უფრო ღიად და აშკარად აკრიტიკებს ხელისუფლებას და ძალიან მკვეთრი კრიტიკა გვესმის.

მმართველ გუნდში დაიწყო ის პროცესი, რაც ძალიან ბუნებრივად მოხდებოდა, ერთმანეთს დაერია პოლიტიკური შემადგენლობა, რომელიც დღეს ქვეყანას მართავს ბიძინა ივანიშვილის სახელით. ცხადია დაპირისპირება. ამ ხალხისგან ხომ ყველაფერია მოსალოდნელი, ეს არის ის ხალხი, რომელიც ერთი წლის წინ გვიმტკიცებდა, რომ გახარიაზე უკეთესი კრიზისმენეჯერი მსოფლიოში არ არსებობს და დღეს რას არ აბრალებენ ყოფილ თანაგუნდელს. შიდა დაპირისპირებაა და ამ დაპირისპირების შემდეგ ძალიან მწვავე გაგრძელება გვინახავს”, - განაცხადა სალომე სამადაშვილმა.

სალომე სამადაშვილის განცხადებით, არსებული ვითარებიდან გამომდინარე შეუძლებელია დღის წესრიგში ვადამდელი არჩევნების საკითხი არ იდგეს, ხოლო თუკი ვადამდელი არჩევნები დაინიშნება, „ოცნება“ ნებისმიერ საარჩევნო სისტემაში წააგებს.

“„ქართული ოცნება“ ცდილობს, რომ დააბნიოს ადამიანები, კიდევ ერთხელ ცდილობს მოატყუოს, საერთაშორისო პარტნიორები, საზოგადოება. უკან აპირებს დაიხიოს საკონსტიტუციო ცვლილებების მიღებისგან და ამბობს, რომ ოპოზიციამ გასცეს პირობა, რომ არ მოითხოვს ვადამდელ არჩევნებს. ოპოზიცია კი არ ითხოვს ვადამდელ არჩევნებს, ვადამდელ არჩევნებს და იმას, რომ ეს ხელისუფლება ვერ მართავს ქვეყანას ჩვენ გვაჩვენებს ის გარემო, რომელშიც ჩვენ ვცხოვრობთ. ჩვენ ერთადერთხელ მივაღწიეთ რაღაცას ჩვენს პოლიტიკურ პროცესში, როცა დაიდო ისეთი შედეგი, რომელსაც მხარს უჭერს ოპოზიციაც და ხელისუფლებაც და ეს იყო საკონსტიტუციო ცვლილებები. ამისი ფანჯრიდან გადაგდება „ოცნების მხრიდან, ეს იქნება დანაშაული საკუთარი ქვეყნის წინაშე.

დღევანდელი მოცემულობით, „ოცნება“ ისე სწრაფად მიემართება ფსკერისკენ, რომ რა სისტემითაც არ უნდა ჩატარდეს ვადამდელი არჩევნები, ის ვერ მოიგებს, ეს გვაჩვენა ადგილობრივმა არჩევნებმაც. რაც შეეხება მოხსნას დღის წესრიგიდან ვადამდელი არჩევნების, ეს არის თავისი შინაარსით აბსურდული მოთხოვნა, ნებისმიერ საპარლამენტო რესპუბლიკაში ვადამდელი არჩევნები ყოველთვის დგას დღის წესრიგში. როდესაც ხელისუფლება არის იმისთვის საკმარისად სუსტი, რომ დანიშნოს ვადამდელი არჩევნები და ოპოზიცია საკმარისად ძლიერი და ვითარება ამას მოითხოვს, ვადამდელი არჩევნები ნებისმიერ მომენტში შეიძლება დაინიშნოს. წარმოუდგენელია, რომ ვინმემ მოხსნას ვადამდელი არჩევნები დღის წესრიგიდან”, - განაცხადა სალომე სამადაშვილმა.