პარლამენტში "ლელო საქართველოსთვის" ლიდერები ბადრი ჯაფარიძე, დავით უსუფაშვილი, ანა ნაცვლიშვილი და დეპუტატი სალომე სამადაშვილი ევროპის საბჭოს საპარლამენტო ასამბლეის მონიტორინგის კომიტეტის წევრებს შეხვდნენ.

„ევროსაბჭოს მონიტორინგის ჯგუფი პერიოდულად აფასებს საქართველოს ვალდებულებების შესრულებას, რომელიც ჩვენ ევროსაბჭოს წინაშე ავიღეთ. ეს ვალდებულებები პირდაპირ კავშირშია იმასთან, თუ როგორაა ჩვენი მოქალაქეების უფლებები დაცული და როგორ ფუნქციონირებს დემოკრატიული პროცესი ქვეყანაში“, - განაცხადა ანა ნაცვლიშვილმა შეხვედრის დასრულების შემდეგ.

პრესსამსახურის ცნობით, შეხვედრაზე მიმდინარე პოლიტიკური პროცესები განიხილეს. ისაუბრეს ქვეყანაში არსებულ პოლიტიკურ, ეკონომიკურ და სოციალურ ვითარებაზე. ყურადღება გამახვილდა შარლ მიშელის დოკუმენტის აღსრულების მნიშვნელობაზე, საარჩევნო და სასამართლო რეფორმაზე.

„შეხვედრაზე საუბარი შეეხო იმ ნაბიჯებს, რომელიც ქვეყნის საზიანოდ გადადგა "ქართულმა ოცნებამ", დაწყებული 19 აპრილის შეთანხმებიდან ცალმხრივად გასვლით, გაგრძელებული მტრული საუბრით, მტრის ხატის შექმნით, პოლიტიზირებული მართლმსაჯულებით, მედიაზე და პოლიტიკურ ოპონენტებზე ზეწოლით და მუდმივი დაძაბულობის ინიცირებით ქვეყანაში'', - განაცხადა ანა ნაცვლიშვილმა.