ე.წ. ციანიდის საქმეზე მსჯავრდებული დეკანოზი გიორგი მამალაძე კორონავირუსისგან გამოჯანმრთელდა. როგორც „ინტერპრესნიუსს“ დეკანოზის ძმამ, თორნიკე მამალაძემ განუცხადა, მისი ძმა სამოქალაქო კლინიკიდან კვლავ გლდანის მე-18 სამკურნალო დაწესებულებაში რამდენიმე დღის წინ გადაიყვანეს.

მამალაძის თქმითვე, დეკანოზს აღნიშნულ დაწესებულებაში არანაირი მკურნალობა არ უტარდება, მას ხელ-ფეხი კვლავ პარალიზებული აქვს და ეს მისი ჯანმრთელობის მთავარ პრობლემად რჩება.

თორნიკე მამალაძის განმარტებით, დეკანოზი გლდანის მე-18 დაწესებულებაში უკვე 3 წელია რაც იმყოფება.

ცნობისთვის, გიორგი მამალაძე თბილისის აეროპორტში 2017 წლის 10 თებერვალს დააკავეს. ის სასამართლომ შურისძიების მოტივით ციანიდის გამოყენებით შორენა თეთრუაშვილის მკვლელობის მომზადებაში ცნო დამნაშავედ და 9-წლიანი პატიმრობა მიუსაჯა.