ადვოკატი - არ ველოდები, რომ ვინმეს პასუხისმგებლობა დადგება, რადგან დარწმუნებული ვარ, სააკაშვილის მიმართ არაადამიანური მოპყრობის გადაწყვეტილება მიიღო „ქართული ოცნების" ხელისუფლებამ

ბუნებრივია არ ველოდები, რომ რომელიმე პირის პასუხისმგებლობა დადგება, რადგან ღრმად ვარ დარწმუნებული, რომ მიხეილ სააკაშვილის მიმართ არაადამიანური მოპყრობის გადაწყვეტილება არ მიუღია ციხის ადმინისტრაციის რომელიმე თანამშრომელს ან ციხის დირექტორს, ან თუნდაც პენიტენციური სამსახურის რომელიმე დეპარტამენტის უფროსს - ეს გადაწყვეტილება იყო პოლიტიკური გადაწყვეტილება და ის მიიღო "ქართული ოცნების" ხელისუფლებამ, - ამის შესახებ ყოფილი პრეზიდენტის მიხეილ სააკაშვილის ადვოკატმა შოთა თუთბერიძემ გორის ჰოსპიტალში შესვლამდე განაცხადა.

მისი თქმით, დღეს სახელმწიფო ინსპექტორის აპარატის წარმომადგენლები არაადამიანური მოპყრობის ფაქტზე მიხეილ სააკაშვილს გამოკითხავენ.

"ჩემი და მიხეილ სააკაშვილის დღევანდელი შეხვედრის ძირითადი მიზანი იქნება მისი ჯანმრთელობის მდგომარეობა, რადგან სახალხო დამცველის ეგიდით შექმნილი კონსილიუმის დასკვნა, მე ვფიქრობ, საკმაოდ მნიშვნელოვანია და ცუდი ამბები გამოამჟღავნა. ამასთან, დღეს შედგება გამოკითხვა სახელმწიფო ინსპექტორის აპარატის მიერ მიხეილ სააკაშვილის იმიტომ, რომ თქვენ იცით, რომ მიმდინარეობს სისხლის სამართლის გამოძიება პრეზიდენტის მიმართ არაადამიანური მოპყრობისა და წამების ფაქტზე, ჩადენილი სახელმწიფო მოხელეების მიერ, მათ შორის, სამართალდამცავი ორგანოების თანამშრომლების მხრიდან.

სახელმწიფო ინსპექტორის სამსახურს გამოძიების ფარგლებში ჩვენ უკვე მივაწოდეთ სრული ინფორმაცია, რაც გვქონდა და სრულად ვთანამშრომლობთ ამ ერთ-ერთ იშვიათ გამონაკლის ადმინისტრაციულ ორგანოსთან, რომელსაც ჯერ კიდევ შერჩენილი აქვს დამოუკიდებლობა და ძალიან ობიექტურად იძიებს საქმეებს. დღეს ინსპექტორის გამომძიებლების თხოვნით ჩვენ მეორედ შევხვდებით პრეზიდენტს და გავივლით რამდენიმე დეტალს და კითხვას, რომელიც სახელმწიფო ინსპექტორს დარჩა ან წარმოიშვა პირველი დაკითხვის შემდეგ. მე ბუნებრივია არ ველოდები, რომ რომელიმე პირის პასუხისმგებლობა დადგება, რადგან ღრმად ვარ დარწმუნებული, რომ მიხეილ სააკაშვილის მიმართ არაადამიანური მოპყრობის გადაწყვეტილება არ მიუღია ციხის რომელიმე ადმინისტრაციის თანამშრომელს ან ციხის დირექტორს, ან თუნდაც პენიტენციური სამსახურის რომელიმე დეპარტამენტის უფროსს - ეს გადაწყვეტილება იყო პოლიტიკური გადაწყვეტილება და ის მიიღო "ქართული ოცნების" ხელისუფლებამ, ამიტომ ბუნებრივია, სახელმწიფო ინსპექტორის გამოძიებას მივესალმებით და ბოლომდე ვითანამშრომლებთ და ყველაფერს ვიღონებთ, რომ გამოძიება ჩატარდეს მაქსიმალურად ეფექტურად, თუმცა სახელმწიფო ინსპექტორი არ არის პოლიტიკური ხელისუფალი, მას არც ბრალის წაყენების უფლებამოსილება აქვს და არ ველოდებით, რომ ამ ქვეყნის პოლიტიკური ხელისუფლება მოინდომებს საკუთარივე ბრძანების შემსრულებლები დასაჯოს", - განაცხადა თუთბერიძემ.

გარდა ამისა, ადვოკატის განცხადებით, დაცვის მხარისთვის მიხეილ სააკაშვილის ციხეში გადაყვანასთან დაკავშირებით არავის უცნობებია და თუ ეს ასე მოხდა, გადაწყვეტილების მიმღები ყველა პირი შესაბამის ფასს გადაიხდის.

"რუსთავის ციხეში მიხეილ სააკაშვილის გადაყვანასთან დაკავშირებით, მსგავსი გეგმის ან განზრახვის შესახებ ჩვენთვის არავის არ უცნობებია იმიტომ, რომ პენიტენციური სამსახური და იუსტიციის სამინისტრო აგრძელებს ძალიან უსინდისო ტრადიციას, რომ მისტიკურობის ფარდას აფარებს ხოლმე საკუთარ საქმიანობას და აგრძელებს თეა წულუკიანის პოლიტიკას ამ მიმართულებით. ამიტომ ვერ გეტყვით რას გეგმავენ ოფიციალურად. ცალსახად უნდა ითქვას, რომ სახალხო დამცველმა ძალიან მკაფიოდ აღწერა რა სჭირდება მიხეილ სააკაშვილს, საიდანაც მკაფიოდ გამომდინარეობს, რომ მიხეილ სააკაშვილის გადაყვანა თავისუფლების აღკვეთის დაწესებულებაში არის მისთვის პირდაპირ მიყენებული ზიანი, მისი ჯანმრთელობის დაზიანების კიდევ ერთი მცდელობა. მე იმედი მაქვს, რომ ეს არ მოხდება და თუ მოხდება, ბუნებრივია, შესაბამის ფასს გადაიხდის ყველა გადაწყვეტილების მიმღები პირი", - განაცხადა შოთა თუთბერიძემ.

ანდრო გოცირიძე - 3+3-ის ფორმატის უსარგებლობა და საფრთხის შემცველობა ცხადია, უკრაინაში მიმდინარე მოვლენების ფონზე მასში საქართველოს გაწევრიანება, შესაძლოა, რუსეთიდან ჩვენზე ზეწოლის ერთ-ერთი მიმართულებაც იყოს
ქართული პრესის მიმოხილვა 17.01.2022
იოსებ ბარათაშვილი - ხაზარაძე-ჯაფარიძისა და წერეთლის საქმე  ერთი მხრივ, შერჩევითი და შეკვეთილი  მართლმსაჯულების, ხოლო მეორე მხრივ კი გამოძიების მწარმოებელი ორგანოს არაკომპეტენტურობის ნიმუშია
ტერაბანკი სამომხმარებლო სესხებსა და საკრედიტო ბარათებზე აქციას იწყებს
"სილქნეტის" ულიმიტო პაკეტები აქტიური ზამთრისთვის