საკრებულოები უმრავლესობის ფორმირებისათვის კონკრეტული ვადით შეზღუდული არ იქნება

მუნიციპალიტეტების საკრებულოებში უმრავლესობის ფორმირებისათვის კონკრეტული ვადა კანონით განსაზღვრული არ იქნება. “ადგილობრივი თვითმმართველობის კოდექსში“ დაგეგმილი ცვლილებებით, საკრებულოებში უმრავლესობისა და ოპოზიციის ცნებები შემოდის. ამასთან, პროექტის მიხედვით, საკრებულოს უმრავლესობის რეგისტრაცია ახალარჩეული საკრებულოს პირველი შეკრებიდან არაუგვიანეს 35-ე დღისა უნდა მოხდეს. აღსანიშნავია, რომ ეს ვადა საპარლამენტო უმრავლესობის ფორმირების ვადის ანალოგიურია.

კანონპროექტის პლენარულ სხდომაზე განხილვისას, საკრებულოებთან მიმართებით 35-დღიანი ვადის პროექტიდან ამოღების საკითხი დადგა, რაც მომხსენებელმა - რეგიონული პოლიტიკისა და თვითმმართველობის კომიტეტის თავმჯდომარემ სოზარ სუბარმა გაიზიარა.

“ხომ არ იქნებოდა მიზანშეწონილი, რომ საკრებულოები ასეთი ვადით არ შევზღუდოთ? უმრავლესობა მხოლოდ არჩევნებში გამარჯვებული პარტიის წევრთა სიას არ ნიშნავს. უმრავლესობას საკრებულოს რამდენიმე წევრი ქმნის - ეს შეიძლება იყოს არჩევნებში გამარჯვებული პარტიაც და მასთან ერთად, საკრებულოს სხვა რომელიმე წევრი. ამას მრავალპარტიულობის ფორმატის გათვალისწინებით შეიძლება რაღაც ვადები დასჭირდეს. ან რატომ არის 35 დღე და არა 5 ან 60 დღე? საკრებულოებს მივცეთ ვადა და შესაძლებლობა, უმრავლესობის სია ბიუროს როცა შეძლებენ, მაშინ წარუდგინონ“, - განაცხადა პარლამენტის პლენარულ სხდომაზე, საპროცედურო საკითხთა და წესების თავმჯდომარის მოადგილემ გურამ მაჭარაშვილმა.

მაჭარაშვილის მოსაზრება იმის თაობაზე, რომ საკრებულოების უმრავლესობის რეგისტრაციისთვის ვადა კანონით არ განისაზღვროს, “ევროპელ სოციალისტმა“ დეპუტატმა ფრიდონ ინჯიამ გაიზიარა.

როგორც ინჯიამ აღნიშნა, უმრავლესობის ფორმირება მაშინ უნდა მოხდეს, “როცა შეიკრიბებიან და საერთო ენას მონახავენ“. კოლეგების პასუხად სოზარ სუბარმა განმარტა, რომ საკრებულოებში უმრავლესობის ფორმირების ყველა დებულება, მათ შორის 35-დღიანი ვადაც პარლამენტის რეგლამენტით განსაზღვრული წესებისა და ვადების ანალოგიურია.

ამასთან, როგორც სუბარმა განაცხადა “35-დღიანი ვადა პრინციპული საკითხი არ არის“ და კანონპროექტიდან ვადის ამოღების წინადადება გაიზიარა.

ეკატერინე ციმაკურიძე - სასამართლოსა და პროკურატურის რეფორმისთვის რეალური ნაბიჯების გადაუდგმელად ევროინტეგრაცია ვერ მოხდება, თუნდაც სხვა ყველა საკითხი შესრულდეს
ქართული პრესის მიმოხილვა 11.08.2022
გიორგი კუნაძე - რუსეთის რეჟიმის  კრახი გარდაუვალია, დღეს უკვე ცხადად ჩანს, რომ ეს მხოლოდ დროის საკითხია
საქართველოს უძრავი ქონების პირველად ბაზარზე ფასების ცვლილების დინამიკა 2022 წლის ზაფხული (R)
სს ლიბერთი ბანკის საცალო საბანკო საქმის მიმართულების დირექტორად თორნიკე კორძაია დაინიშნა
USAID-ის პროგრამის ,,დამსაქმებლები პროფესიული განათლებისთვის’’ და  ,,ტრანსფორდის“ ერთობლივი ინიციატივით 43 ადამიანი დასაქმდა