საქართველოში გაეროს ბავშვთა ფონდის წარმომადგენელს, ღასან ხალილს ბსუ-ს საპატიო დოქტორის წოდება მიენიჭა

ბათუმის შოთა რუსთაველის სახელმწიფო უნივერსიტეტის აკადემიურმა საბჭომ საქართველოში გაეროს ბავშვთა ფონდის წარმომადგენელს, სამართლის დოქტორ ღასან ხალილს საპატიო დოქტორის წოდება მიანიჭა. ამის შესახებ ინფორმაციას ბათუმის სახელმწიფო უნივერსიტეტი ავრცელებს.

მათივე ინფორმაციით, იგეგმება დოქტორ ღასან ხალილის ჩართვა ბსუ-ს განათლების ადმინისტრირების სამაგისტრო პროგრამასა და განათლების მეცნიერებების სადოქტორო პროგრამაში, სამეცნიერო ხელმძღვანელის პოზიციაზე.

„ღასან ხალილმა მნიშვნელოვანი წვლილი შეიტანა ბსუ-ს განვითარებასა და მომავალი თაობების აღზრდის საქმეში. მისი ინიციატივით, Unicef-ის საქართველოს ოფისი წლებია მხარს უჭერს უნივერსიტეტს სხვადასხვა საგანმანათლებლო აქტივობის განხორციელებაში. დოქტორ ღასან ხალილის ხელმძღვანელობით ბათუმის სახელმწიფო უნივერსიტეტში გაიხსნა ბავშვთა უფლებების ცენტრი, ჩატარდა საერთაშორისო კონფერენცია ბავშვის უფლებებზე, დაფინანსდა და ხორციელდება საგრანტო პროექტი ბავშვთა უფლებების ცენტრის გასაძლიერებლად, ტრენინგები გაირა აკადემიურმა პერსონალმა ზოგადი განათლების დაწყებითი საფეხურის მასწავლებლის მომზადებისა და სკოლამდელი განათლების საკითხებში.

დოქტორი ღასან ხალილი 2018 წლის სექტემბრამდე მუშაობდა UNICEF-ის რეგიონული ოფისის უფროსი მრჩევლის თანამდებობაზე ახლო აღმოსავლეთისა და ჩრდილოეთ აფრიკის საკითხებში, იყო სპეციალური წარმომადგენელი ლიბიაში. მას აქვს ოცდახუთ წელზე მეტი ხნის მნიშვნელოვანი პროფესიული გამოცდილება სხვადასხვა კუთხით, მუშაობდა მაღალ თანამდებობებზე სამთავრობო და არასამთავრობო ორგანიზაციებში, გაეროში, იყო დამოუკიდებელი მთავარი კონსულტანტი, არის უნივერსიტეტის პროფესორი, მკვლევარი და ექსპერტი.

დოქტორი ღასან ხალილი მსოფლიოს სხვადასხვა ქვეყნის უმაღლეს საგანმანათლებლო დაწესებულებაში ეწეოდა სამეცნიერო მოღვაწეობას. მისი სამეცნიერო ინტერესების სფეროა ადამიანის უფლებები, ქალთა და ბავშვთა უფლებები, კულტურული მრავალფეროვნება და ინტერ კულტურული დიალოგი, უფლებებზე დაფუძნებული მიდგომები და სტრატეგიული მენეჯმენტი. მისი ავტორობითა და თანაავტორობით გამოქვეყნებულია 20-ზე მეტი წიგნი და კვლევითი ნაშრომი, მათ შორის მონოგრაფია ბავშვთა უფლებების საერთაშორისო ისტორიული ევოლუციის შესახებ.

დოქტორ ღასან ხალილს აქვს ლიბანის უნივერსიტეტის სამართლის მაგისტრის ხარისხი, პარიზის სორბონის უნივერსიტეტის საერთაშორისო ბიზნეს სამართლის მაგისტრის ხარისხი და პარიზის სორბონის დეკარტის უნივერსიტეტის საერთაშორისო სამართლის დოქტორის ხარისხი“, - ნათქვამია ინფორმაციაში.

ზურაბ ბატიაშვილი - საქართველოს მთავარი პრობლემა იმაშია, რომ საბჭოთა კავშირი იურიდიულად 31 წლის წინ კი დაიშალა, მაგრამ მენტალური საბჭოთა კავშირი ისევ აქაა და არსად წასულა
ქართული პრესის მიმოხილვა 15.08.2022
ეკატერინე ციმაკურიძე - სასამართლოსა და პროკურატურის რეფორმისთვის რეალური ნაბიჯების გადაუდგმელად ევროინტეგრაცია ვერ მოხდება, თუნდაც სხვა ყველა საკითხი შესრულდეს
უკრაინულმა კრიპტოვალუტის ბირჟამ WhiteBIT საკუთარი ტოკენის გაშვების შესახებ გამოაცხადა
ბაზისბანკის ფინანსური ჩართულობით, ახალგაზრდობის საერთაშორისო დღისადმი მიძღვნილი კონკურსის ფინალური შეხვედრა გაიმართა