რა თქმა უნდა, სამწუხაროა, რომ ასეთი გადაწყვეტილება მიიღეს, თუმცა ეს არის ნაფიც მსაჯულთა სასამართლოს გადაწყვეტილება, საბოლოოდ მათ უნდა მიეღოთ ის გადაწყვეტილება, რომელსაც თვითონ თვლიდნენ სწორად, - ამის შესახებ გუდაურში 28 წლის თამაზ გორთამაშვილის მკვლელობის საქმის პროკურორმა დავით ყაზარაშვილმა ნაფიც მსაჯულთა სასამართლოს მიერ მერაბ კობიაშვილის უდანაშაულოდ ცნობის საკითხზე კომენტირებისას განაცხადა.
მისივე განცხადებით, ბრალდების მხარე თვენახევრის განმავლობაში ყველაფერს აკეთებდა იმისთვის, რათა ნაფიცმსაჯულთა სასამართლოსთვის სიმართლე დაენახებინა.
"თვენახევრის განმავლობაში ყველაფერს ვაკეთებდით იმისთვის, რომ ნაფიც მსაჯულთა სასამართლოსთვის მთელი სისხლის სამართლის საქმის მასალა და ის სიმართლე დაგვენახებინა, რომელიც იყო ამ საქმეში. რა თქმა უნდა სამწუხაროა, რომ ასეთი გადაწყვეტილება მიიღეს, თუმცა ეს არის ნაფიც მსაჯულთა სასამართლოს გადაწყვეტილება, საბოლოოდ მათ უნდა მიეღოთ ის გადაწყვეტილება, რომელსაც თვითონ თვლიდნენ სწორად. გამოძიების დაწყებიდან მერაბ კობიაშვილი არ აღიარებდა მიხეილ უნდილაშვილის ცემას, რითიც დაიწყო ეს ყველაფერი. ნაფიც მსაჯულთა სასამართლომ თქვა, რომ მერაბ კობიაშვილს ნაცემი ჰყავდა მიხეილ უნდილაშვილი“, - აღნიშნა დავით ყაზარაშვილმა.
ცნობისთვის, გუდაურში 28 წლის თამაზ გორთამაშვილის მკვლელობაში ბრალდებული მერაბ კობიაშვილი ნაფიც მსაჯულთა სასამართლომ უდანაშაულოდ ცნო. აღნიშნული გადაწყვეტილება გორის რაიონულ სასამართლოში ნაფიც მსაჯულთა სასამართლომ მიიღო.
2020 წლის 16 თებერვალს, გუდაურში ახალგაზრდა მამაკაცი მოკლეს, ერთი კი დაჭრეს. აღნიშნულთან დაკავშირებით, სამართალდამცავებმა მერაბ კობიაშვილი დააკავეს. კობიაშვილს მკვლელობას, მკვლელობის მცდელობასა და ძალადობას ედავებოდნენ. ამასთან, პროკურატურამ მერაბ კობიაშვილის მიმართ ჯგუფურად განხორციელებული ძალადობის ფაქტზე ბრალი 6 პირს წარუდგინა და მათი საქმე ცალკე წარმოებად გამოიყო.