იუსტიციის მინისტრი რატი ბრეგაძის ვარაუდით, 2008 წლის რუსეთ-საქართველოს ომის საქმეზე ჰააგაში დაწყებული გამოძიების პირველად შედეგებს მომავალი წლის პირველ ნახევარში უნდა ველოდოთ.
როგორც ბრეგაძემ პარლამენტის პლენარულ სხდომაზე განაცხადა, იუსტიციის სასამართლო ჰააგის სისხლის სამართლის საერთაშორისო სასამართლოსთან აქტიურად თანამშრომლობს და შეხვედრები რეგულარულად იმართება.
“უნდა ვთქვათ, რომ ძალიან დიდი იმედი გვაქს იმისა, რომ სტრასბურგის სასამართლოს ისტორიული გადაწყვეტილება ჰააგის სასამართლოში მიმდინარე გამოძიებაზე საქართველოს სასარგებლოდ ძალიან პოზიტიურ გავლენას მოახდენს და ქართველების სიმართლე გამოძიებით დადასტურდება. დარწმუნებული ვარ, ჩვენი ღირსეული ოფიცრები, რომლებიც 2008 წელს იბრძოდნენ, მხოლოდ საკუთარი ქვეყნის დასაცავად მოქმედებდნენ. რა თქმა უნდა, მათ ქმედებებში ყველა ის საერთაშორისო ნორმა იყო გათვალისწინებული, რაც ომთან დაკავშირებულ სამართალს შეეხება“, - განაცხადა იუსტიციის მინისტრმა პარლამენტის ტრიბუნიდან.
ბრეგაძის ინფორმაციით, გამოძიების დასრულების ზუსტი ვადა უცნობია და მთლიანად სასამართლოს პროკურორის ოფისზეა დამოკიდებული.