გორის სამხედრო ჰოსპიტალში საქართველოს მესამე პრეზიდენტის მიხეილ სააკაშვილის მოსანახულებლად „ნაციონალური მოძრაობის“ წევრი ხატია დეკანოიძე მივიდა.
როგორც დეკანოიძემ მიხეილ სააკაშვილთან შესვლამდე ჟურნალისტებთან საუბრისას განაცხადა, მას აინტერესებს როგორია სააკაშვილის ჯანმრთელობის მდგომარეობა და აღნიშნა, რომ საქართველოს მესამე პრეზიდენტს სრულფასოვანი მკურნალობის საშუალება უნდა მიეცეს.
„მე რამდენადაც მქონდა ექიმებისგან ინფორმაცია, სააკაშვილის მდგომარეობა ნამდვილად არ არის ის მდგომარეობა, რომელიც აუცილებელია მისი სრულფასოვანი რეაბილიტაციისთვის. ექიმების რეკომენდაციაა, რომ რაც შეიძლება სასამართლო პროცესზე, საჯარო სივრცისგან თავი შეიკავოს. მისი გადაწყვეტილება როგორი იქნება არ ვიცი და ამაზეც ვისაუბრებთ.
ის წამება, არაადამიანური მოპყრობა, სახელმწიფოს მხრიდან მთელი რეპრესიული მანქანის ამუშავება მის წინააღდეგ, რაც ვიხილეთ კადრები, გულისხმობს იმას, რომ უნდა მიეცეს სრულფასოვანი მკურნალობის საშუალება, რაც არ ეძლევა“,- განაცხადა დეკანოიძემ.