საკრებულოში ისნის რაიონის მაჟორიტარი დეპუტატის კახაბერ ლაბუჩიძის განცხადებით, ვაზისუბანში მდებარე კორპუსის მდგრადობას, სადაც აფეთქება მოხდა, სპეციალისტები შეისწავლიან.
მისი თქმით, ადამინები, ვინც აღნიშნულ კორპუსში ცხოვრობდა, ტერიტორიიდან გამოიყვანეს, საჭიროების შემთხვევაში მათ სასტუმროში გადაიყვანენ. გამგეობის წარმომადგენლის თქმით, შენობის მდგრადობის შესწავლის მიზნით, ადგილზე თბილისი ლაბორატორიის წარმომადგენლებს ელოდებიან.
"ამ ეტაპისთვის ერთდაერთი ეჭვი რაზეც გვაქვს, ფაქტია, რომ ამ ბინაში იყო გაზის დაგროვება. რაღაცის პროვოცირების შედეგად მოხდა ამ დაგროვილი გაზის აფეთქება და გაჩნდა ხანძარი. ახლა ადგილზე მოვა თბილისი ლაბორატორია შენობის მდგრადობასთან დაკავშირებით და დილამდე გვექნება ინფორმაცია", - განაცხადა ლაბუჩიძემ.
შეგახსენებთ, ვაზისუბნის დასახლებაში, მე-15 კორპუსში, პირველ სართულზე აფეთქება მოხდა, რამაც ხანძარი გამოიწვია. შსს-ს საგანგებო სიტუაციების მართვის სამსახურის წარმომადგენლის ინფორმაციით, აფეთქება კორპუსში პირველ სართულზე ბუნებრივი აირის დაგროვების შედეგად მოხდა. ამ დროისთვის ხანძარი სრულად ლიკვიდირებულია. ამავე ინფორმაციით, დაშავდა სულ 4 ადამიანი, მათგან ერთმა დამწვრობა მიიღო, რომლის მდგომარეობა მძიმეა, ხოლო 3-მა პირმა ინტოქსიკაცია მიიღო.