ის, რომ რუსეთის ფედერაციას რეგიონთან მიმართებაში განსხვავებული გეგმები აქვს, ყველასთვის ნათელია, მაგრამ ამის მიუხედავად, ნატო-ს გაფართოება პარტნიორების მხრიდან ერთმნიშვნელოვნად გადაწყვეტილი საკითხია - ბუქარესტის სამიტის გადაწყვეტილებები არ გადაიხედება! - ამის შესახებ უმრავლესობის დეპუტატმა ირაკლი ჩიქოვანმა განაცხადა.

მისი თქმით, ეს არის ნათელი და მკაფიო პოზიცია, რაც ალიანსის წევრებს გააჩნია.

"ჩვენ კარგად უნდა გვესმოდეს, რომ იმის მიუხედავად თუ რა განცხადებებს გააკეთებს რუსეთის ფედერაცია, ნატოს გაფართოება არც ერთ სხვა სახელმწიფოზე დამოკიდებული არ იქნება, გარდა იმ სახელმწიფოებისა, ვინც ამ ორგანიზაციაში არიან და იმ სახელმწიფოებისა, ვისაც გაერთიანების სურვილი აქვს. რას აკეთებს სახელმწიფო ინტეგრაციის თვალსაზრისით? - დღესდღეისობით ცხადი და ნათელია, ყველა ნათლად ადასტურებს, რომ თანამშრომლობის ის დონე, რაც ჩვენ ალიანსთან და ალიანსის წევრ სახელმწიფოებთან გვაქვს, არის უპრეცედენტო. ამას კვლავაც გავაგრძელებთ და გვაქვს პოლიტიკური კონსულტაციებიც", - განაცხადა ირაკლი ჩიქოვანმა.