თეთრი სახლი აცხადებს, რომ რუსეთთან დიალოგი მხოლოდ დეესკალაციის პირობებში და მხოლოდ ევროპელ მოკავშირეებთან და პარტნიორებთან კოორდინაციითაა შესაძლებელი.

„ჯეიკ სალივანმა განაცხადა აშშ-ის მზადყოფნაზე, ჩაერთოს დიპლომატიაში მრავალი არხით, მათ შორის ორმხრივი ჩართულობით, ნატო-რუსეთის საბჭოსა და ეუთოს საშუალებით. მან მკაფიოდ განაცხადა, რომ ნებისმიერი დიალოგი უნდა იყოს დაფუძნებული ნაცვალგების პრინციპზე, ითვალისწინებდეს ჩვენს შეშფოთებას რუსეთის ქმედებებთან დაკავშირებით და გაიმართოს ჩვენს ევროპელ მოკავშირეებსა და პარტნიორებთან სრული კოორდინაციით. მან ასევე აღნიშნა, რომ არსებითი პროგრესი შესაძლებელია მხოლოდ დეესკალაციის და არა ესკალაციის პირობებში“, - ნათქვამია თეთრი სახლის განცხადებაში, რომელიც უსაფრთხოების საკითხებში აშშ-ის პრეზიდენტის მრჩეველ ჯეიკ სალივანისა და საგარეო პოლიტიკის საკითხებში რუსეთის პრეზიდენტის მრჩევლის, იური უშაკოვის სატელეფონო საუბრის შემდეგ გამოქვეყნდა.

გასულ კვირაში, რუსეთის საგარეო საქმეთა სამინისტრომ გამოაქვეყნა ნატოსთან და შეერთებულ შტატებთან უსაფრთხოების ხელშეკრულებების პროექტები, სადაც მოსკოვი დაჟინებით მოითხოვს გარანტიებს, რომ ალიანსი აღმოსავლეთით არ გაფართოვდება.