“ნაციონალური მოძრაობის” მიერ დაგეგმილ მასობრივი შიმშილობის პროტესტს ათამდე სამოქალაქო აქტივისტი, მათ შორის, ნიკა ფარულავაც უერთდება. როგორც ფარულავამ ჟურნალისტებს პარტიის ოფისში განუცხადა, წნეხის გაზრდა პოლიტიკური დევნის შეწყვეტისთვის მნიშვნელოვანია.

“მნიშვნელოვანია წნეხის გაზრდა პოლიტიკური დევნის შეწყვეტისთვის, იმისათვის, რომ ამ ქვეყანაში არასდროს იყოს მაგალითად, რამაზ გერლიანის გაუჩინარების მსგავსი ქეისები, დასრულდეს ავტორიტარიზმი და დიქტატურა. როდესაც საზოგადოებას ვთხოვთ, უნდა გამოფხიზლდნენ და შემოუერთდნენ წინააღმდეგობის მოძრაობას ამისთვის საჭიროა ნახონ, რომ შენ ყველაფერზე ხარ წამსვლელი და პროტესტის უკიდურეს ზომებსაც მიმართავ. სწორედ ამიტომ მივიღე ეს გადაწყვეტილება” , - განაცხადა ნიკა ფარულავამ.

პარტია “ნაციონალური მოძრაობის” ცენტრალური ოფისის ეზოში კარვები გაშალეს, სადაც პარტიის წევრები პროტესტის ნიშნად დღეიდან შიმშილობას გეგმავენ. ამ დროისთვის ტერიტორიაზე ორი კარავია გაშლილი.

მასობრივი შიმშილობის დაწყების შესახებ პარტიის თავმჯდომარემ, ნიკა მელიამ რუსთაველის გამზირზე მიმდინარე აქციაზე განაცხადა. მისი თქმით, შიმშილობის აქცია იქამდე არ შეწყდება, ვიდრე მიხეილ სააკაშვილი არ გათავისუფლდება.