სახალხო დამცველის ნინო ლომჯარიას ინფორმაციით, სახალხო დამცველის აპარატმა ეკონომიკის ექსპერტის, რამაზ გერლიანის საქმის შესწავლა დაიწყო.
როგორც ნინო ლომჯარიამ ჟურნალისტებთან საუბრისას განმარტა, შესწავლის ფარგლებში როგორც თავად რამაზ გერლიანს, ასევე მისი ოჯახის წევრებს შეხვდებიან.
„ჩვენ დაწყებული გვაქვს ამ საქმის შესწავლა. პირადად მქონდა კომუნიკაცია შინაგან საქმეთა სამინისტროსთან და მივიღე ინფორმაცია, რაც დღეს საჯაროდ გახდა ცნობილი. ვაპირებთ კონტაქტს ოჯახთან და თავად რამაზ გერლიანთან, რომელიც აცხადებს, რომ პოლიციელის მხრიდან ადგილი ჰქონდა ზეწოლას. რა თქმა უნდა, შევისწავლით ამ საქმეს და დაწყებული გვაქვს შესწავლა”, - აღნიშნა ნინო ლომჯარიამ.
შეგახსენებთ, ახლობლების ცნობით, „ეკონომიკური ტრანსფორმაციის ცენტრის“ დირექტორი, რამაზ გერლიანი, გაურკვეველ ვითარებაში 3 დღის წინ გაუჩინარდა. მათივე ინფორმაციით, გერლიანის ავტომობილი ბოლოს ავჭალის პოლიციის შენობასთან შენიშნეს. როგორც ახლობლები აცხადებენ, რამაზ გერლიანს 3 დღე ვერ უკავშირდებოდნენ.
გერლიანი პოლიციამ 3-დღიანი გაუჩინარების შემდეგ დღეს დილით, სხვა ქალაქში იპოვა. თავად ეკონომისტი რამაზ გერლიანის განცხადებით, გაუჩინარებისას „სიკვდილთან შეხვედრა“ ჰქონდა დაგეგმილი და „პოლიციამ მიუსწრო“.