ეროვნული კონტრტერორისტული სტრატეგია პასუხობს ტერორიზმის სფეროში არსებულ ყველა გამოწვევას, ყველა იმ რისკს და საფრთხეს, რომლის წინაშეც, შესაძლოა, დადგეს ჩვენი ქვეყანა,- ამის შესახებ თავდაცვის კომიტეტის თავმჯდომარე ირაკლი ბერაიამ ჟურნალისტებთან პარლამენტის თავდაცვისა და უშიშროების და ადამიანის უფლებათა დაცვის კომიტეტების გაერთიანებული სხდომის დასრულების შემდეგ განაცხადა, სადაც უსაფრთხოების სამსახურის საინფორმაციო ანალიტიკური დეპარტამენტის დირექტორს გიორგი საბედაშვილს უსმენდნენ, რომელმაც ეროვნული კონტრტერორისტული სტრატეგიის პროექტი წარადგინა.
ბერაიას განცხადებით, დოკუმენტი, რომელიც საბედაშვილმა წარადგინა, მოიცავს რამდენიმე მიმართულებას ისეთ სფეროებში, როგორიც არის პრევენცია, დაცვა, მზადყოფნა, ტერორისტული დანაშაულის და რისკების შესახებ ინფორმაციის შეგროვება და ანალიზი, ასევე, ტერორიზმთან ბრძოლის საერთაშორისო მექანიზმები.
"გვქონდა ძალიან საინტერესო დისკუსია, დავსვით ბევრი კითხვა და მივიღეთ ამომწურავი პასუხები. ეს მოსმენა გაიმართა სახელმწიფო უსაფრთხოების სამსახურის ინიციატივით, რაც კიდევ ერთხელ ადასტურებს მჭიდრო თანამშრომლობას საზედამხედველო ინსტიტუტთან, როგორიც არის პარლამენტი და სამსახურის გამჭვირვალობას. დოკუმენტი არის საკმაოდ ყოვლისმომცველი და ის წარმოადგენს და შეიცავს საქართველოს ერთიანი, ეროვნული კონტრტერორისტული ძალისხმევის ჩამონათვალს მომდევნო წლების განმავლობაში, რაც უზრუნველყოფს ჩვენი კონტრტერორისტული ძალისხმევის ეფექტიანობას. ეროვნული კონტრტერორისტული სტრატეგია პასუხობს ტერორიზმის სფეროში არსებულ ყველა გამოწვევას, რომელიც შეიძლება არსებობდეს როგორც გლობალური მასშტაბით, ასევე რეგიონში და ყველა იმ რისკს და საფრთხეს, რომლის წინაშეც, შესაძლოა, დადგეს ჩვენი ქვეყანა, მოიცავს კომპლექსურ ღონისძიებებს,"- განაცხადა ბერაიამ.