სააგენტოს „აწარმოე საქართველოში" ექსპორტის მხარდაჭერის მიმართულებას დაემატა ახალი კომპონენტი.
ამის შესახებ ინფორმაციას „აწარმოე საქართველოში“ ავრცელებს.
„კერძოდ, პროგრამა შედგება სამი კომპონენტისაგან: პროდუქტის ლიცენზირება/სერტიფიცირება, რომლის დაფინანსების მოცულობა განისაზღვრა 20,000 ლარით. აღნიშნული მოიცავს საწარმოს აუდიტის საერთაშორისო სტანდარტის დანერგვას; ხარისხის დამადასტურებელი საერთაშორისო სერტიფიკატის მოპოვებას და მეწარმე სუბიექტის მიერ წარმოებული პროდუქტის ლიცენზირებას.
ბრენდინგი/პროდუქციის შეფუთვა, რომლის დაფინანსების მოცულობა განისაზღვრა 20,000 ლარით. აღნიშნული მოიცავს ბრენდის ჩამოყალიბებისა და განვითარების სტრატეგიის შემუშავება; ბრენდის ტრანსფორმაცია/ცვლილება (rebranding) და პროდუქციის შეფუთვა ბრენდის სახელმძღვანელოს (brandbook) შესაბამისად;
საერთაშორისო გაყიდვების სტიმულირება ექვივალენტი ლარში, რომელიც საერთაშორისო სავაჭრო ქსელში შესვლის ხელშეწყობას გულისხმობს. აღნიშნულის დაფინანსების მოცულობა - 10 000 ევრო ექვივალენტი ეროვნულ ვალუტაში”, - ნათქვამია ინფორმაციაში.