ბატონი ზურა ახალგაზრდა პიროვნებაა, ენერგიული, კარგი გამოცდილებით. ყველას იმედი უნდა გვქონდეს, რომ საქმეს თავს გაართმევს და საკმაოდ წარმატებული მინისტრი გახდება, - საკოორდინაციო საბჭოს დასრულების შემდეგ ასე დაახასიათა ამირან გამყრელიძემ ჯანდაცვის ახალი მინისტრი, ზურა აზარაშვილი.
როგორც გამყრელიძემ აღნიშნა, დღეს ის პირველად შეხვდა ჯანდაცვის ახალ მინისტრს და დარწმუნებულია, რომ უახლოეს დღეებში მას კიდევ შეხვდება.
„ის ეკონომიკისა და ფინანსების ძალიან მაღალი დონის სპეციალისტია, თანაც სერიოზული გამოცდილებით. მოგეხსენებათ, ჯანდაცვის სამინისტროს ჩვენ მოკლედ ვეძახით „ჯანდაცვის“, არადა ეს გახლავთ ყველაზე უფრო დიდი და მაღალბიუჯეტიანი სამინისტრო. რატომღაც ყველას ჰგონია, რომ ამ სამინისტროს მთლიანი ბიუჯეტი - 6 მილიარდი ლარი იხარჯება ჯანდაცვისთვის, არადა აქედან 1.2 მილიარდი ლარი იხარჯება ჯანდაცვის ხარჯებისთვის, ხოლო დანარჩენი გახლავთ პენსიები, სოციალური დახმარებები და სხვ. სოციალური სფეროს ფინანსური კომპონენტი და მართვა ერთ-ერთი მთავარია“, - განაცხადა გამყრელიძემ.