მაშინ, როდესაც ნატო-ში გაწევრიანების რეზოლუცია ხელისუფლების მიერ გაურკვეველი ვადით გადაიდო, მიმდინარე სესიაზე დაგეგმილი ყველა ნაბიჯი დემოკრატიული სისტემის და საქართველოს მოქალაქეების საწინააღმდეგოდ არის მიმართული, - ამის შესახებ ოპოზიციონერმა დეპუტატმა, სალომე სამადაშვილმა განაცხადა.
მან რუსეთიდან მომავალ საფრთხეებზე ისაუბრა და აღნიშნა, რომ ამასთან დაკავშირებით პარლამენტის მიერ საქართველოს ნატო-ში გაწევრიანების შესახებ რეზოლუციის მიღება არის საჭირო, რასაც „ქართული ოცნება“ არ ჩქარობს.
„ერთი მხრივ ვხედავთ, რომ რუსეთი ძალიან აგრესიულად გვიტევს და ცდილობს, რომ ფაქტობრივად ახლავე, ახალი წლის შემდეგ დაიწყოს გარანტიების გაცემა იმაზე, რომ ნატო არ უნდა გაფართოვდეს. ჩვენ დაინიცირებული გვაქვს რეზოლუცია ნატო-ში გაწევრიანების შესახებ. იმის ნაცვლად, რომ ამ დღეებს მმართველი უმრავლესობა იყენებდეს იმისთვის, რომ ჩვენ წლის ბოლოს ნათლად ვუპასუხოთ რუსეთს საქართველოს ნატო-ში გაწევრიანების რეზოლუციის მიღებით, ეს საკითხი მათ ჩააგდეს, გადადეს და დღის წესრიგი შეავსეს იმ პოლიტიკური საკითხებით, რომელიც მხოლოდ ერთადერთ რამეს ემსახურება - ეს არის დამტკიცდეს ხელისუფლების კონტროლი სასამართლო სისტემაზე, თავისუფალი მედიის საშუალებებზე, გაუქმდეს მოქალაქეების დამცავი დამოუკიდებელი სამსახური“, - აღნიშნა სამადაშვილმა.