სახალხო დამცველსაც სიამოვნებით გაუკეთებდით ლიკვიდაციას, რომ არ იყოს საკონსტიტუციო დაცვის გარანტიები, - ამის შესახებ „სტრატეგია აღმაშენებლის“ ერთ-ერთმა ლიდერმა, პაატა მანჯგალაძემ პარლამენტის რიგგარეშე სესიის პლენარულ სხდომაზე განაცხადა.

მისი თქმით, „ქართულ ოცნებას“ ძალაუფლების დაკარგვის ეშინია.

როგორც მანჯგალაძემ აღნიშნა, რასაც დღეს ხელისუფლება აკეთებს, სისუსტის გამოვლინებაა.

„თქვენ გეშინიათ ძალაუფლების დაკარგვის და ახლა, რასაც აკეთებთ, არ არის თქვენი ძლიერებით ნაკარნახევი. ძლიერი ხელისუფლება ასე არ იქცევა. ეს არის სისუსტის გამოვლინება, რომ ერთი უწყების პოზიციამაც მიგიყვანათ იქამდე, მისი ლიკვიდაცია გადაწყვიტეთ. უფრო მეტიც, სახალხო დამცველსაც სიამოვნებით გაუკეთებდით ლიკვიდაციას, რომ არ იყოს საკონსტიტუციო დაცვის გარანტიები. ირაკლი კობახიძე საუბრობდა კიდეც ნოემბერში ამაზე, გააკეთა განცხადება, რომ შეიძლება დავაყენოთ სახალხო დამცველის პასუხისმგებლობის საკითხი, - ეს არის თქვენი რეალური სახე და არა ის, რომ ეფარებით ფარისევლურად, ვითომ ევროპულ ღირებულებებს და ევროპულ სტანდარტებს“, - განაცხადა პაატა მანჯგალაძემ.