სამწუხაროა, ის ფაქტი, რომ მიხეილ სააკაშვილის პირადად გაცნობა ამ ვითარებაში მომიწია - ხედვები და მოსაზრებები გავუზიარეთ, - ამის შესახებ „ნაციონალური მოძრაობის" ბათუმის საკრებულოს დეპუტატმა, მირდატ ქამადაძემ რუსთავის ციხესთან განაცხადა, სადაც მან საქართველოს მესამე პრეზიდენტი, მიხეილ სააკაშვილი მოინახულა.
როგორც ქამადაძე განმარტავს, მიხეილ სააკაშვილთან შეხვედრაზე ბათუმში არსებულ პოლიტიკური კრიზისზე ისაუბრეს.
„სამწუხაროა, ის ფაქტი, რომ მიხეილ სააკაშვილის პირადად გაცნობა ამ ვითარებაში მომიწია. დღეს მას პირისპირ პირველად შევხვდი. ვისაუბრეთ იმ მნიშვნელოვან საკითხებზე, როგორიც არის ბათუმის პოლიტიკური კრიზისი, ჩვენ ეს საკითხი გვაინტერესებდა. ჩვენი ხედვები და მოსაზრებები გავუზიარეთ. შესაბამისად, მოვისმინეთ მისი პოზიციები, კონკრეტულ გეგმაზე. როგორც აქამდე, ჩვენ ვაგრძელებთ ბრძოლას, რომელსაც ჰქვია თავისუფლებისთვის ბრძოლა, უკეთესი მომავლისთვის ბრძოლა და ბრძოლა ცვლილებებისთვის, რასაც ბათუმმა 2 ოქტომბრის არჩევნებზე დაუჭირა მხარი“,- აღნიშნავს ქამადაძე და დასძენს, რომ მიხეილ სააკაშვილი სამართლიან სასამართლოს ითხოვს, „რომლითაც ნებისმიერი ადამიანი ისარგებლებს“.