სიტუაცია ისეთი არ არის, რომ რომელიღაც პარტიის ლიდერმა რაღაც მოითხოვოს, დანარჩენი ოპოზიცია დალაგდეს და მისი ნება შეასრულოს - თუ ყველაფერი თანამშრომლობის ფარგლებში იქნება, რატომაც არა - შექმნან საგამოძიებო კომისია! - ასე ეხმაურება “გირჩის“ დეპუტატი ალექსანდრე რაქვიაშვილი საპარლამენტო საგამოძიებო კომისიების შექმნის თაობაზე “ნაციონალური მოძრაობისა“ და მისი ლიდერის მიხეილ სააკაშვილის ინიციატივას.
რაქვიაშვილის თქმით, ზოგადად, საგამოძიებო კომისია ნორმალური საპარლამენტო ინსტრუმენტია და ამ საქმეში ის ოპოზიციის აქტივობის მხარდამჭერია.
“ამ შემთხვევაში არც წამების საკითხი მაინტერესებს, რადგან არ მგონია, რომ აქ რაიმე განსაკუთრებული აღმოჩნდება და არც ელექტროენერგიის ტარიფთან დაკავშირებული საკითხი, რადგან მიაჩნია, რომ ქვეყნის წინაშე არსებული პრობლემები ბევრად უფრო სერიოზულია, თუმცა თუკი ჩემი კოლეგები მიიჩნევენ, რომ თემა სერიოზულია და საგამოძიებო კომისიები უნდა შეიქმნას, რატომაც არა. მიხეილ სააკაშვილის მხრიდან აღნიშნული საკითხის მოთხოვნის ფორმით დაყენება, არასწორია. ნებისმიერ ასეთ საკითხებზე გადაწყვეტილების მიღებას თანამშრომლობა და ნორმალური კოლეგიალური და ადამიანური ურთიერთობები სჭირდება“, - განაცხადა ალექსანდრე რაქვიაშვილმა ჟურნალისტებთან საუბრისას.