12 იანვარს, ხელით ბეჭდვის საერთაშორისო ფესტივალის - LIFE N STYLE - ის ფარგლებში, ოთხი ხელოვანის მიერ შექმნილი ვიდეო-არტების პრეზენტაცია გაიმართება. ნამუშევრები ზურაბ წერეთლის თანამედროვე ხელოვნების მუზეუმში იქნება წარმოდგენილი.

პროექტი ფესტივალის მიერ ექვსი წლის განმავლობაში შექმნილი ექსკლუზიური სერიგრაფიული კოლექციის პრეზენტაციას ითვალისწინებს, რომელიც 2022 წლის 22 იანვრამდე გაგრძელდება.

ორგანიზატორთა ინფორმაციით, უნიკალური ანაბეჭდების გარდა, თანამედროვე ხელოვნების მუზეუმის სივრცეში წარმოადგენილი იქნება სხვადასხვა მედიაში მომუშავე არტისტებთან კოლაბორაციული პროექტები. მონაწილე არტისტებიდან ფესტივალი აქცენტს ოთხ ქართველ ხელოვან ქალზე აკეთებს, რომლებიც ოთხ დამოუკიდებელ ვიდეო ინსტალაციას წარმოადგენენ.

ორგანიზატორთა ცნობით, ოთხივე არტისტი ერთი და იგივე მედიუმის გამოყენებით, სამყაროს სრულიად განსხვავებული, ახლებური რაკურსით დანახვის მცდელობას გვთავაზობს და თითოეული პროექტი სათქმელის წარმოჩენის სიმძაფრით, საკმაოდ კატეგორიული ტონით და ფორმით გამოირჩევა.

12 იანვარს, შემდეგი არტისტების ნამუშევრები იქნება წარმოდგენილი: ელენე რაქვიაშვილი - "წყალნი წავლენ და წამოვლენ, ქვიშანი დარჩებიანო...", მარი ათანელი - "იფიქრე ნაკლები, იგრძენი მეტი.. /საუნდი - ნიკოლა იაკუტ" ხოსილიტა - "მან იცის", ქრისტინე ტუსიაშვილი - "სუბორდინაცია საკუთარ თავთან" .

ამავე სივრცეში სტუმრებს საშუალება ექნებათ უტა ბექაიას მულტიმედია ნამუშევარი - "ხაზებს შორის" და ანა თელიას ინსტალაცია "ენერგეტიკული პორტალი" დაათვალიერონ. პროექტი თბილისის მუნიციპალიტეტის მერიის და MOMA თბილისი /ზურაბ წერეთლის სახელობის თანამედროვე ხელოვნების მუზეუმის მხარდაჭერით ხორციელდება.