თენგიზ ფხალაძე - რუსეთი ცდილობს „გაღმა შეედავე, გამოღმა შეგრჩება“ პრინციპით იმოქმედოს, რომ რაიმე მაინც გამოივაჭროს - ამ პერიოდში, მაქსიმალურად შეეცდება გამოიყენოს შანტაჟის ყველა შესაძლებლობა მეზობელ სახელმწიფოებზე

მოლაპარაკება შედგება არა მხოლოდ ამერიკა-რუსეთის ფორმატში, წინ გვაქვს კიდევ ნატო-რუსეთის ფორმატის შეხვედრები - რუსეთი ამ პერიოდში მაქსიმალურად შეეცდება გამოიყენოს შანტაჟის ყველა შესაძლებლობა და ასევე თავისი გავლენის გაძლიერება მეზობელ სახელმწიფოებზე , - ამის შესახებ ევროპის საერთაშორისო პოლიტიკური ეკონომიკის ევროპული ცენტრის უფროსმა მკვლევარმა, თენგიზ ფხალაძემ “პალიტრანიუსის“ გადაცემაში "პოლიტიკური სივრცე“ განაცხადა.

მისი თქმით, რუსეთის მხრიდან გავლენის გაძლიერება შესაძლოა გამოიხატოს სამხედრო ყოფნის გაძლიერებით, კიბერშეტევებით თუ ე.წ. მეხუთე კოლონის გააქტიურებით.

როგორც ფხალაძემ აღნიშნა, საქართველოს სჭირდება მეტი მხარდაჭერა და მაქსიმალური გააქტიურება, რუსეთის აგრესიისგან თავის დასაცავად.

„დამთავრდა პირველი რაუნდი, რადგან მოლაპარაკება ამით არ დასრულებულა, ისევ გაგრძელდება. მოლაპარაკება შედგა არა მხოლოდ ამერიკა-რუსეთის ფორმატში, წინ გვაქვს კიდევ ნატო-რუსეთის ფორმატის შეხვედრები. რუსეთს რამდენიმე მიზანი აქვს: პირველი, რუსეთი ცდილობს „გაღმა შეედავე, გამოღმა შეგრჩება“ პრინციპით იმოქმედოს და დააყენოს მაქსიმალური მოთხოვნები, რომ რაიმე მაინც გამოივაჭროს. მეორე, რუსეთს აინტერესებს რამდენად ერთიანია დასავლეთის პასუხი და რამდენად მტკიცე იქნება ის პასუხი, რასაც ის მიიღებს. ამის მიხედვით გათვლის მის შემდგომ ქმედებებს უახლოეს მეზობლებთან მიმართებაში. ეს არის საკმაოდ გრძელვადიანი თამაში, დროში გაწელილი, ნერვების თამაში და რუსეთი ამ პერიოდში მაქსიმალურად შეეცდება გამოიყენოს შანტაჟის ყველა შესაძლებლობა, რაც მის ხელთ არის და ასევე თავისი გავლენის გაძლიერება მეზობელ სახელმწიფოებზე, იქ თავისი ჰიბრიდული საცეცების გააქტიურება. გავლენის გაძლიერება შეიძლება გამოიხატოს ყველაფერში, -დაწყებული სამხედრო ყოფნის გაძლიერებიდან, კიბერშეტევები, ე.წ. მეხუთე კოლონის გააქტიურება, დეზინფორმაცია, პროვოკაციები საოკუპაციო ხაზთან, - ის, რასაც ჩვენ ამდენი ხანია ვუყურებთ.

დღევანდელ დღეს მეტი მხარდაჭერა სჭირდება საქართველოს და მეტი გაფრთხილება რუსეთს იმასთან დაკავშირებით, რომ თუ საქართველოსთან რაიმეზე ხელი წაუცდება, ეს იქნება მისთვის ძალიან მძიმე შედეგის მომტანი. სამწუხაროდ, ასეთი განცხადება არსად მომისმენია. სანამ დღეს საქართველოს ტერიტორიები ოკუპირებულია, სანამ გვაქვს საოკუპაციო ხაზი და ხალხს იტაცებენ, სანამ ჩვენ სახელმწიფოებრიობას საფრთხე ემუქრება, წყნარად ყოფნის უფლება არავის არ აქვს. უნდა ვიყოთ მაქსიმალურად აქტიურები იმისათვის, რომ ის საფრთხე, რაც გვემუქრება, ავიცილოთ“, - განაცხადა ფხალაძემ.

ემილ ავდალიანი - ყველაფერი რეგიონში საქართველოს უფრო მზარდ როლზე მოასწავებს, საჭიროა მხოლოდ შექმნილი ვითარების სწორად გამოყენება
ქართული პრესის მიმოხილვა 18.08.2022
ალექსეი გარანი - პუტინს უნდა რომ უკრაინა დათმობებზე წავიდეს, მაგრამ უკრაინა მშვიდობის სანაცვლოდ, ქვეყნის ტერიტორიულ მთლიანობასთან დაკავშირებული საკითხებით ვაჭრობას არ აპირებს
"გალფის" ინიციატივით 100 პირველკურსელს, რომელმაც ერთიან ეროვნულ გამოცდებში უმაღლესი ქულები მიიღო, ერთწლიანი ყოველთვიური სტიპენდია დაენიშნება
„საქართველოს ბანკის“ აქციების ღირებულება რეკორდულ მაქსიმუმზეა
„ევროპელი სოციალისტების” წევრები, დავით ზილფიმიანი და ზაზა მიქაძე ერთობლივ განცხადებას ავრცელებენ
კომპანია PSP ფარმაცევტული სექტორის განვითარებაზე კონცენტრირდება და არაპროფილური ბიზნესებიდან გამოდის