ხათუნა ბურკაძე -  ჩვენი სუვერენული ინტერესების დაცვისთვის, პარტნიორების მხარდაჭერით, საქართველოს უსაფრთხოების უზრუნველყოფის სათანადო გეგმაა მისაღები

რუსეთის ულტიმატუმები წესებზე, საერთაშორისო ნორმებზე დაფუძნებულ საერთაშორისო წესრიგს ეწინააღმდეგება და დიდი ზიანის მომტანია საერთაშორისო მშვიდობისათვის, უსაფრთხოებისათვის, - ამის შესახებ ანალიტიკური ორგანიზაცია „ჯეოქეისის“ ინფორმაციით, ამერიკისმცოდნეობისა და ევროატლანტიკური ინტეგრაციის მიმართულების ხელმძღვანელმა, პროფესორმა ხათუნა ბურკაძემ ნატო-რუსეთის საბჭოს სხდომისა და აშშ-რუსეთის მოლაპარაკებების დაწყების შეფასებისას განაცხადა.

ბურკაძის შეფასებით, ის არის მცდელობა ე.წ. „გავლენის სფეროების“ აღდგენის და სახელმწიფოთა სუვერენული ნების შელახვის. ამასთან, მისივე თქმით, ამერიკის შეერთებული შტატების მტკიცე პოზიციაა, რომ აშშ არ მიიღებს გადაწყვეტილებებს ევროპის უსაფრთხოების შესახებ ევროპელების გარეშე, ასევე, უკრაინასა და საქართველოსთან დაკავშირებით - უკრაინისა და საქართველოს გარეშე.

როგორც ბურკაძე ამბობს, რუსეთის საგარეო საქმეთა მინისტრის მოადგილესთან სერგეი რიაბკოვთან თითქმის რვასაათიანი მოლაპარაკებების შემდეგ, ამერიკის შეერთებული შტატების სახელმწიფო მდივნის მოადგილემ, უენდი შერმანმა განაცხადა, „ჩვენ არავის მივცემთ უფლებას დახუროს ნატო-ს ღია კარის პოლიტიკა“.

„ეს დასტურია იმისა, რომ ნატო-ს გაფართოების პროცესთან დაკავშირებით მიღებული გადაწყვეტილებები არ გადაიხედება, რაც დაცულია ჩრდილოატლანტიკური ხელშეკრულების მე-10 მუხლით. კერძოდ, ნატო-ში წევრობა დამოკიდებულია, ერთი მხრივ, ალიანსში წევრობის მსურველი ევროპული სახელმწიფოს მიერ განხორციელებულ რეფორმებსა და წვლილზე ევროატლანტიკური უსაფრთხოების უზრუნველყოფის პროცესში და, მეორე მხრივ, ნატო-ს ყველა წევრის გადაწყვეტილებაზე მხარი დაუჭირონ ალიანსში ახალი წევრის მიღებას“, - დასძინა ხათუნა ბურკაძემ.

როგორც ხათუნა ბურკაძემ აღნიშნა, ნიშანდობლივია, რომ ნატო-რუსეთის საბჭოს შეხვედრის გამართვამდე სატელეფონო საუბარი შედგა საქართველოს ვიცე-პრემიერს, საგარეო საქმეთა მინისტრს, დავით ზალკალიანსა და ნატო-ს გენერალური მდივნის მოადგილე მირჩა ჯოანასთან. ასევე, აშშ-სა და რუსეთს შორის მოლაპარაკებების დაწყებამდე აშშ-ის სახელმწიფო მდივნის მოადგილე, უენდი შერმანი საქართველოს საგარეო საქმეთა მინისტრს, დავით ზალკალიანს ესაუბრა. ამასთანავე, ევროპელ კოლეგებთან შეხვედრისას აშშ-ს სახელმწიფო მდივანმა ენტონი ბლინკენმა რუსეთის მიერ საქართველოს წინააღმდეგ განხორციელებულ აგრესიაზე ისაუბრა და გამოხატა ურყევი მხარდაჭერა საქართველოს სუვერენიტეტის, მისი ტერიტორიული მთლიანობისადმი. საქართველოში აშშ-ს ელჩის კელი დეგნანის განცხადებით კი, რუსეთს ვერ ექნება ვეტოს უფლება საქართველოს სუვერენულ გადაწყვეტილებებზე.

ბურკაძის თქმით, ასევე, აღსანიშნავია, რომ ამერიკის შეერთებული შტატები და მისი მოკავშირეები ყველა სცენარისათვის მზად არიან.

„საერთაშორისო არენაზე განვითარებული მოვლენების ანალიზის საფუძველზე შეიძლება ითქვას, რომ რუსეთიდან მომდინარე საფრთხეებთან გამკლავებისათვის კრიტიკულად მნიშვნელოვანია, ერთიანი ძალისხმევითა და პარტნიორებთან სტრატეგიული კომუნიკაციის საშუალებების გაძლიერებით, საქართველოს უსაფრთხოების უზრუნველყოფის სათანადო სამოქმედო გეგმა შემუშავდეს, რომელშიც აისახება სხვადასხვა დონეზე განსახორციელებელი შემაკავებელი ზომები დიპლომატიური, პოლიტიკური, ეკონომიკური, თავდაცვითი ინსტრუმენტების გათვალისწინებით. ასევე, აღნიშნული გეგმის მეშვეობით საჭიროა განისაზღვროს ინფორმაციულ-საკომუნიკაციო ტექნოლოგიების როლი სტრატეგიულად ურთულეს გარემოში. ეს კი როგორც საჯარო, ასევე სამოქალაქო, კერძო აქტორების უპრეცედენტოდ კონსოლიდირებულ ჩართულობას მოითხოვს. დღევანდელი მოცემულობა გვკარნახობს დაუყოვნებლივ და კოორდინირებულ მოქმედებებს, რათა ჩვენი სახელმწიფოებრივი, სუვერენული ინტერესები დავიცვათ“, - განაცხადა ხათუნა ბურკაძემ.

ემილ ავდალიანი - ყველაფერი რეგიონში საქართველოს უფრო მზარდ როლზე მოასწავებს, საჭიროა მხოლოდ შექმნილი ვითარების სწორად გამოყენება
ქართული პრესის მიმოხილვა 18.08.2022
ალექსეი გარანი - პუტინს უნდა რომ უკრაინა დათმობებზე წავიდეს, მაგრამ უკრაინა მშვიდობის სანაცვლოდ, ქვეყნის ტერიტორიულ მთლიანობასთან დაკავშირებული საკითხებით ვაჭრობას არ აპირებს
„ევროპელი სოციალისტების” წევრები, დავით ზილფიმიანი და ზაზა მიქაძე ერთობლივ განცხადებას ავრცელებენ
კომპანია PSP ფარმაცევტული სექტორის განვითარებაზე კონცენტრირდება და არაპროფილური ბიზნესებიდან გამოდის
კახა ოქრიაშვილი - საერთაშორისო იზოლაცია, უვიზო მიმოსვლის შეჩერება, ტოტალური გაღატაკება - აი, ეს მოაქვს ბატონ ივანიშვილს
გავლენიანმა საერთაშორისო ბიზნეს გამოცემა Global Finance-მა 2022 წლის გამარჯვებულები გამოავლინა