პრემიერის განცხადებით, თბილისსა და გონიოში საერთაშორისო ფინანსური ზონები შეიქმნება, რისთვისაც საკანონმდებლო ინიციატივის მომზადება იწყება

საქართველოს პრემიერ-მინისტრის, ირაკლი ღარიბაშვილის ინფორმაციით, ქვეყანაში სპეციალური ფინანსური ცენტრების შექმნისთვის საკანონმდებლო ინიციატივის მომზადება იწყება.

დავალება ამის შესახებ ირაკლი ღარიბაშვილმა მთავრობის სხდომის დაწყებისას ეკონომიკისა და მდგრადი განვითარების მინისტრს მისცა.

როგორც ღარიბაშვილმა აღნიშნა, სპეციალური ფინანსური ცენტრები თბილისსა და გონიოში აშენდება და მისი განვითარება მნიშვნელოვნად შეუწყობს ხელს საქართველოს როგორც განვითარებული საფინანსო ინფრასტრუქტურის მქონე ქვეყნის პოპულარიზებას რეგიონსა და მსოფლიოში.

„რამდენიმე თვის წინ გავაჟღერე ინიციატივა, რომელიც ეხებოდა ქვეყანაში ფინანსური ცენტრების შექმნის იდეას, ამის თაობაზე გავაფორმეთ კონტრაქტი მსოფლიოში ცნობილ ფინანსურ კომპანიასთან Rothschild-თან. ახლა მინდა ეკონომიკის მინისტრს დავავალო, რომ გაუწიოს კოორდინაცია ამ პროცესს, მოამზადოს და წარუდგინოს საკანონმდებლო ინიციატივა საქართველოს პარლამენტს. ჩვენი სურვილია, შევქმნათ საქართველოში სპეციალური საერთაშორისო ფინანსური ზონები, რომლის შექმნა-განვითარება ჩვენი ვარაუდით ხელს შეუწყობს ინვესტიციების მოზიდვას, სამუშაო ადგილების შექმნას, თანამედროვე, ფინანსური, ტექნოლოგიური სიახლეების გაზიარებას და ქვეყნის რეგიონულ-ფინანსურ ცენტრად ჩამოყალიბებას. ეს უნდა იყოს ჩვენი საერთო, საბოლოო მიზანი. გვაქვს ორი ფინანსური ცენტრის შექმნის იდეა, ერთი, რომ შეიქმნას თბილისის ფინანსური ცენტრი, თბილისის ზღვასთან 110 ჰექტარ მიწის ფართობზე განთავსდება და ქვეყნის და რეგიონის გამორჩეული საქმიანი ცენტრი გახდეს აღნიშნული ადგილი. ანალოგიური ცენტრის ჩამოყალიბება იგეგმება აჭარაში, გონიოს ტერიტორიაზე. გონიოში ჩვენ უფრო მულტიფუნქციური ცენტრის შექმნას ვგეგმავთ. ამის თაობაზე უკვე აქტიური მუშაობა დავიწყეთ. აქვე გვინდა, რომ შევქმნათ ფინანსური ცენტრი. სპეციალური ფინანსური ზონები საერთაშორისო კომპანიებს შესთავაზებენ საერთო სამართლის პრინციპებზე დაფუძნებულ სამართლებრივ რეჟიმს, ასევე საუკეთესო საერთაშორისო პრაქტიკაზე დაფუძნებულ ლიბერალურ, რეგულატორულ და ფისკალურ რეჟიმებს. რაც მთავარია, ფინანსურ ზონებში მოქმედი საერთშორისო კომპანიების პერსონალის მნიშვნელოვანი ნაწილი საქართველოს მოქალაქეები იქნებიან, რაც მათ განსაკუთრებული პროფესიული და კარიერული განვითარების საშუალებას მისცემს“, - განაცხადა ღარიბაშვილმა.

მისივე თქმით, საქართველო მრჩეველი კომპანია Rothschild-ის დელეგაციას ერთ კვირაში მიიღებს.

„მნიშვნელოვანია ისიც, რომ თბილისის და გონიოს ფინანსური ცენტრების შექმნაში მონაწილეობას მიიღებენ მაღალი საერთაშორისო რეპუტაციის და გამოცდილების მქონე კომპანიები, როგორიც არის ჩვენი მრჩეველი კომპანია Rothschild-ი. ერთ კვირაში ჩვენ მივიღებთ მათ დელეგაციას და დავიწყებთ აქტიურ მუშაობას. ჩვენი გათვლებით სპეციალური ფინანსური ზონების შექმნა მნიშვნელოვნად შეუწყობს ხელს საქართველოს როგორც განვითარებული საფინანსო ინფრასტრუქტურის მქონე ქვეყნის პოპულარიზებას რეგიონში და მსოფლიოში. ჩვენი სურვილი და მიზანია, რომ საქართველო გახდეს რეგიონული ფინანსური ცენტრი. ფინანსური ზონები ორიენტირებული იქნება ისეთ საერთაშორისო კომპანიებზე, რომლებიც ოპერირებენ აქტივების მართვის, ფინტეკის, სასაქონლო ტრეიდინგის, კაპიტალის მართვის და სხვა დარგებში. საბოლოო ჯამში ჩვენი ვარაუდია, რომ აღნიშნული ფინანსური ცენტრების ამოქმედება მნიშვნელოვნად შეუწყობს ხელს კაპიტალის ბაზრის განვითარებას, რაც ჩვენი ქვეყნის ეკონომიკური პოლიტიკის ერთ-ერთი პრიორიტეტია“, - განაცხადა ღარიბაშვილმა.

ავთანდილ წულაძე - მაკრონის, შოლცისა და ტუსკის შეხვედრის შემდეგ ცხადი გახდა, რომ უკრაინის იარაღის გარეშე დატოვების გეგმა ჩავარდა, ევროპისა და უკრაინა-რუსეთს შორის სამხედრო დაპირისპირება გაგრძელდება  და გაღრმავდება
ახალი ზოოპარკი და ახალი ბინადრები, რომელთა ნახვაც დამთვალიერებლებს შეეძლებათ - რა ეტაპზეა თბილისის ზღვაზე ახალი ტერიტორიის მოწყობა?
ქართული პრესის მიმოხილვა 18.03.2024
კავკასიის ავტომარკეტი - ავტომობილის ყიდვის ახლებური გამოცდილება
ქართული ღვინის წარმატება იაპონიაში - TSV Estate Winery-მ განსაკუთრებული მოწონება დაიმსახურა
ახალი „ბაკურიანი“ ხილის გემოთი - ნატურალური მინერალური წყალი, ბაკურიანის მთებიდან, ნაკლები შაქრით