პასიური პოზიცია, რომელიც დღეს სამწუხაროდ აქვს საქართველოს, რომ თითქოს ის, რაც ხდება უკრაინაში და შავი ზღვის რეგიონში, საქართველოს არ ეხება, სახიფათო პოზიციაა. საქართველო უნდა იყოს ძალიან მკაცრი თავის პოზიციებში. ამერიკელები და ევროპელები სწორედ რუსეთის გააქტიურების გამო არიან ერთიანები და ჩვენ ეს შესაძლებლობა მაქსიმალურად უნდა გამოვიყენოთ, რომ საქართველო დღის წესრიგში უბრალოდ არ დაიკარგოს, - ასე აფასებს რუსეთ-უკრაინას შორის მიმდინარე ბოლოდროინდელ მოვლენებს ექსპერტი ვანო მაჭავარიანი.
როგორც მაჭავარიანი აღნიშნავს, რუსეთის აგრესია უკრაინის წინააღმდეგ რეალურია.
„რუსეთმა მიიღო ერთიანი პასუხი დასავლეთისგან, მას ეთქვა უარი ნებისმიერი გავლენის სფეროების აღდგენაზე. ძალიან მნიშვნელოვანია ახლა, რომ საქართველომ სწორად გააკეთოს ამის ანალიზი, პოზიციონირება და მინისტრ ზალკალიანის ვიზიტი ბრიუსელში და ის შეხვედრები, რომელიც მას ჰქონდა ნატო-ს წარმომადგენლებთან, იძლევა იმის საფუძველს, რომ საქართველო სწორ დასკვნებს გამოიტანს და არ ექნება ის პასიური პოზიცია, რომელიც დღეს სამწუხაროდ აქვს საქართველოს, რომ თითქოს ის, რაც ხდება უკრაინაში და შავი ზღვის რეგიონში, საქართველოს არ ეხება. ეს სახიფათო პოზიციაა. საქართველო უნდა იყოს ძალიან მკაცრი თავის პოზიციებში. ამერიკელები და ევროპელები სწორედ რუსეთის გააქტიურების გამო არიან ერთიანები და ჩვენ ეს შესაძლებლობა მაქსიმალურად უნდა გამოვიყენოთ, რომ საქართველო დღის წესრიგში უბრალოდ არ დაიკარგოს", - განაცხადა ვანო მაჭავარიანმა.