ნიკოლოზ სამხარაძე - იქნება უკრაინაში ქართული დელეგაციის ვიზიტიც და მხარდამჭერი რეზოლუციაც - ყველა სავარაუდო სცენარისთვის უნდა ვიყოთ მზად დასავლელ პარტნიორებთან ერთად, რადგან ცალკე აღებული საქართველო რუსეთს წინააღმდეგობას ვერ გაუწევს

ვერ ვიტყვი, რომ უკრაინელებს რაიმე განცდა აქვთ იმისა, რომ საქართველოსგან მხარდამჭერი განცხადებები არ კეთდება, - ამის შესახებ საქართველოს პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ „პალიტრანიუსის“ გადაცემაში „დღის ნიუსრუმი“ განაცხადა.

მისი თქმით, როგორც საქართველოს მთავრობა, ასევე პარლამენტი მუდმივ კონტაქტზეა უკრაინელ კოლეგებთან და იქ განვითარებულ მოვლენებს ყოველდღიურ რეჟიმში ადევნებს თვალს.

გარდა ამისა, როგორც სამხარაძემ განმარტა, უკრაინაში ქართული დელეგაციის ვიზიტზე მუშაობა ჯერ კიდევ დეკემბრის თვიდან მიმდინარეობს.

აქედან გამომდინარე, დეპუტატის თქმით, განცხადებები იმის შესახებ, რომ „ქართული ოცნების“ ხელისუფლება არაფერს აკეთებს, ტყუილია.

„ჩვენ როგორც მთავრობაში, ასევე პარლამენტში მუდმივ კონტაქტზე ვართ ჩვენს უკრაინელ კოლეგებთან და ვიღებთ ინფორმაციას, თუ რა ხდება იქ და რა განვითარებები გვაქვს. ასევე კოორდინირებულად ვმოქმედებთ სხვადასხვა საერთაშორისო ფორუმებზე, ერთმანეთს ვუთანხმებთ პოზიციებს თუ რას ვისაუბრებთ უცხოელ პარტნიორებთან შეხვედრებზე და ძირითადად ვთანხმდებით იმაზე, რომ ეს არ არის მხოლოდ უკრაინის პრობლემა, ეს არის ჩვენი, ზოგადად შავი ზღვის უსაფრთხოების საკითხი. ამ შემთხვევაში ჩვენი მიზნების მისაღწევად, რაც არის ნატოში ინტეგრაცია და რაც არის ასევე, პირველ რიგში, ტერიტორიული მთლიანობის აღდგენა როგორც საქართველოსი, ასევე უკრაინის, კოორდინირებულად ვმოქმედებთ საერთაშორისო არენაზე.

თავს თუ მოვუყრით ამ განცხადებებს, რაც კეთდება როგორც მთავრობის, ასევე პარლამენტის წარმომადგენლებისგან, ვნახავთ, რომ რამდენიმე ათეული განცხადებაც კი შეიძლება შეგვხვდეს. იგივე შეერთებული შტატები და სხვა ქვეყნებიც მხარდამჭერ განცხადებებს აკეთებენ, სიხშირეში შეიძლება იყოს განსხვავებული.

რაც შეეხება თავად უკრაინის პრეზიდენტის განცხადებებს, ისინი იმიტომ არის თამამი, რომ ეს კონცენტრაცია და დღევანდელი საკითხი, პირდაპირ პროპორციულად ეხება უკრაინის უსაფრთხოებას. ჯარები მობილიზებულები არიან უკრაინის საზღვართან.

ვერ ვიტყვი, რომ უკრაინელებს რაიმე განცდა აქვთ იმისა, რომ საქართველოსგან მხარდამჭერი განცხადებები არ კეთდება. იგივე შეუძლია დაადასტუროს ჩვენმა საელჩომ კიევში, რომელიც მუდმივ კონტაქტზეა ჩვენს მეგობრებთან უკრაინაში. ეს მიმდინარე პროცესია და უკრაინას ჩვენგან მხარდამჭერი განცხადებები არასდროს არ მოაკლდება.

რაც შეეხება რეზოლუციას, დღეს ბიუროზე შევთანხმდით, რომ ხვალ ფრაქციებს შორის იქნება შეხვედრა, კონსულტაციები, ისინი შეჯერდებიან ტექსტზე და შემდეგ უკვე განვიხილავთ ამას“, - განაცხადა სამხარაძემ.

ამასთანავე, როგორც მან განმარტა, ნატო რუსეთის დათქმას, საქართველოსა და უკრაინისთვის ბუქარესტის სამიტზე მიცემული პირობის გაუქმებასთან დაკავშირებით, არ მიიღებს, რადგან ამ შემთხვევაში მთლიანად ალიანსის არსებობა შეიძლება დადგეს კითხვის ნიშნის ქვეშ. რუსეთისთვის უარის თქმის შემთხვევაში კი სცენარი შეიძლება რამდენიმენაირად განვითარდეს, რომელთაგან ერთ-ერთი უკრაინაში პირდაპირი სამხედრო ინტერვენციაა, რისთვისაც საქართველო მზად უნდა იყოს.

„ჩვენ ძალიან კარგად ვხედავთ, რომ მთავარი თემა, რომელიც რუსეთმა შემოაგდო, არის, რომ ნატომ უკან წაიღოს უკრაინისა და საქართველოს წევრობის დაპირება. ასევე, ძალიან კარგად ვხვდებით, რომ ნატოსთვის და მთლიანად ზოგადად დასავლეთისთვის ეს ისეთი წინადადებაა, რომელზეც მათ ერთადერთი პასუხი შეიძლება ჰქონდეთ, ეს არის უარი, იმიტომ, რომ თუ ამ დათქმას ისინი მიიღებენ, ნატოს არსებობაც შეიძლება კითხვის ნიშნის ქვეშ დადგეს. სწორედ ამის შემდეგ იწყება ყველაზე მნიშვნელოვანი ეტაპი - რა სცენარები შეიძლება იყოს ამოქმედებული რუსეთის მხრიდან და რისთვის არის მზად დასავლეთი, როგორ შეიძლება ის დაეხმაროს თუნდაც უკრაინას ან საქართველოს ამ სავარაუდო სცენარების დროს. ერთი სცენარი არის ლუგანსკისა და დონეცკის ე.წ. დამოუკიდებლობის აღიარება, რაც ანალოგური იქნება იმისა, რაც რუსეთმა 2008-ში გააკეთა აფხაზეთთან და ცხინვალის რეგიონთან მიმართებით, ეს მძიმე ნაბიჯი იქნება, რომელზეც დასავლეთისგან რაიმე ტიპის რეაქცია იქნება საჭირო. რამდენად შორს წავა დასავლეთი ამ მიმართულებით და რა იქნება აქ მკვეთრი ნაბიჯები, ესეც ძალიან საინტერესოა. სცენარის ერთ-ერთი ნაწილი არის სამხედრო შეჭრა, რომელიც ყველაზე უარესი სცენარია. ჩვენ მოვისმინეთ ჩვენი პარტნიორების როგორც საჯარო განცხადებები, ასევე დახურულ შეხვედრებზეც ყველა გვარწმუნებს იმაში, რომ საქართველოს ინტერესები იქნება დაცული და ჩვენ თქვენ გარეშე არაფერზე რუსეთს არ მოველაპარაკებითო და ეს ძალიან კარგია და ძალიან გვახარებს, მაგრამ მეორე არის, თუ ეს სცენარები განვითარდა, ამ შემთხვევაში რისი იმედი შეიძლება გვქონდეს დასავლელი პარტნიორებისგან. ამიტომ ჯერ ეს იმდენად მიმდინარე პროცესია, რომ ანალიზის და წინასწარი პროგნოზების კეთება სწორი არ იქნება, მაგრამ ამ სავარაუდო სცენარებისთვის უნდა ვიყოთ მზად დასავლელ პარტნიორებთან ერთად, რადგან, ალბათ, ხვდებით, რომ ცალკე აღებული საქართველო რუსეთს სამხედრო წინააღმდეგობას ვერ გაუწევს. პარტნიორებთან მუშაობა სწორედ ამ სცენარებზე მიდის და ძალიან გააქტიურებულია ეს კონტაქტები“, - განაცხადა სამხარაძემ.

ალექსანდრე თვალჭრელიძე - ფრიდმანის წინააღმდეგ სანქციების დაწესებამ იდეალური შესაძლებლობა შექმნა კომპანიის გაკოტრების და იქ სახელმწიფო მმართველის იმპერატიული დანიშვნისთვის, ამას კი „ბორჯომის“ ნაციონალიზაცია უნდა მოჰყვეს
ქართული პრესის მიმოხილვა 20.05.2022
იუველ ნოა ჰარარი - ყველაფერი სასწორზე დაიდო, რადგან პუტინმა დაანგრია უდიდესი ტაბუ, გლობალური წესრიგი - მას რომ შედეგისთვის მიეღწია, ეს მთელ მსოფლიოში გამოიწვევდა დესტაბილიზაციას
თამარ ალადაშვილი - გარემოსდაცვითი ინფორმაციისა და განათლების ცენტრს ახალი ფუნქციები ემატება, რაც კიდევ უფრო მეტად შეუწყობს ხელს საზოგადოების გარემოსდაცვით საკითხებში ჩართულობას
„მაკდონალდს საქართველო“ Mc Happy Day-ის საქველმოქმედო კამპანიას იწყებს
დამზადებულია საქართველოში - „სავალი“ - კიდევ ერთი ახალი ქართული წარმოების ბრენდი „დრესაპ ჯგუფისგან“
ახალი ლიბერთი ადამიანებისთვის - ლიბერთის ახალი საპილოტე პროექტი
BTU-ს სტუდენტური სტარტაპების საგრანტო კონკურსის გამარჯვებული ცნობილია
ლიბერთი პროექტის „ახალგაზრდული მეწარმეობა სოფლის განვითარებისთვის“ სტრატეგიული პარტნიორი  გახდა