ირაკლი ქადაგიშვილი - ყოვლად მიუღებელია ქმედება, რაც პოლიციელმა ჩაიდინა - მასალების მოპოვების შემდეგ მოხდება შემდგომი კვალიფიკაციის დაზუსტება

ყოვლად მიუღებელია ის ქმედება, რაც პოლიციელმა ჩაიდინა. ამასთან დაკავშირებით, მყისიერად დაიწყო გამოძიება, მასალების მოპოვების შემდეგ მოხდება შემდგომი კვალიფიკაციის დაზუსტება - გამოძიება მიტინგის მოწოდების მიხედვით ვერ იხელმძღვანელებს, იგი მოქმედებს სისხლის სამართლის კოდექსით და კონკრეტული მტკიცებულებების სფუძველზე, - ამის შესახებ „ქართული ოცნების“ წევრმა ირაკლი ქადაგიშვილმა „პალიტრანიუსის“ გადაცემაში „360 გრადუსი“ განაცხადა.

მისი თქმით, ის ფაქტი, რომ ვიღაცა რაღაცას მოითხოვს, ეს არ ნიშნავს იმას, თითქოს მაინცდამაინც ასე არის სწორი, შესაძლოა კიდევ სხვა რამესთან იყოს საქმე.

როგორც უმრავლესობის წევრმა აღნიშნა, „გაუცვეთელი ფრაზაა, რომ მიტინგებმა გადაწყვიტოს, ვის რა სასჯელი ეკუთვნის.“

„ყოვლად მიუღებელი არის ის ქმედება, რაც პოლიციელმა ჩაიდინა. ამასთან დაკავშირებით, მყისიერად დაიწყო გამოძიება. მასალების მოპოვების შემდეგ მოხდება შემდგომი კვალიფიკაციის დაზუსტება, თუ ამის შესაბამისი, სამართლებრივი და სხვა მტკიცებულებები იქნება, რასაც გამოიძიება ითხოვს. ის, რომ ვიღაცა რაღაცას მოითხოვს, არ ნიშნავს იმას, რომ მაინცდამაინც ასე არის, შეიძლება უფრო მძიმე რაღაცაც არის, შეიძლება კიდევ სხვა რაღაცაა. გამოძიება ობიექტურ მოცემულობაზე დაყრდნობით გადაწყვეტს, კიდევ რა შეიძლება იყოს.

გაუცვეთელი ფრაზაა, რომ მიტინგებმა გადაწყვიტოს, ვის რა სასჯელი ეკუთვნის. ხალხს, რა თქმა უნდა, გამოსვლის უფლება აქვს და ამის ნებას არავინ უკრძალავს. გამოძიება უნდა წარსდგეს სასამართლოს წინაშე და თუ გამოძიება იქნება არაკვალიფიციური, სასამართლო არ მიიღებს გადაწყვეტილებას და შეიძლება დამნაშავე არ დაისაჯოს სათანადოდ. ამიტომ, გამოძიება მიტინგის მოწოდების მიხედვით ვერ იხელმძღვანელებს, იგი მოქმედებს და ხელმძღვანელობს სისხლის სამართლის კოდექსის, კონკრეტული გარემოებების და მტკიცებულებების საფუძველზე“, - განაცხადა ირაკლი ქადაგიშვილმა.

შეგახსენებთ, 24 იანვარს თბილისის მეტროპოლიტენში გადაღებული ვიდეომასალა გავრცელდა, სადაც პოლიციელის მხრიდან შესაძლო დანაშაულის ჩადენის ფაქტია ასახული. მომხდარზე შინაგან საქმეთა სამინისტრომ განცხადება გაავრცელა, რომლის თანახმადაც შინაგან საქმეთა სამინისტროს გენერალურმა ინსპექციამ ვიდეომასალის გავრცელებისთანავე ფაქტის მოკვლევა დაიწყო, რომლის ფარგლებში მოპოვებული მასალები გადაუგზავნა სახელმწიფო ინსპექტორის სამსახურს. სახელმწიფო ინსპექტორის სამსახურმა პოლიციელის მხრიდან ძალადობით უფლებამოსილების გადამეტების ფაქტზე გამოძიება სისხლის სამართლის კოდექსის 333-ე მუხლით დაიწყო.

შსს განცხადებაში გმობს ნებისმიერი სახის ძალადობას და აცხადებს, რომ უწყებისთვის კატეგორიულად მიუღებელია პოლიციელის მხრიდან ნებისმიერი ძალადობრივი ქმედება, რომელიც შესაძლოა არღვევდეს ადამიანის უფლებებს.

ალექსანდრე თვალჭრელიძე - ფრიდმანის წინააღმდეგ სანქციების დაწესებამ იდეალური შესაძლებლობა შექმნა კომპანიის გაკოტრების და იქ სახელმწიფო მმართველის იმპერატიული დანიშვნისთვის, ამას კი „ბორჯომის“ ნაციონალიზაცია უნდა მოჰყვეს
ქართული პრესის მიმოხილვა 20.05.2022
იუველ ნოა ჰარარი - ყველაფერი სასწორზე დაიდო, რადგან პუტინმა დაანგრია უდიდესი ტაბუ, გლობალური წესრიგი - მას რომ შედეგისთვის მიეღწია, ეს მთელ მსოფლიოში გამოიწვევდა დესტაბილიზაციას
თამარ ალადაშვილი - გარემოსდაცვითი ინფორმაციისა და განათლების ცენტრს ახალი ფუნქციები ემატება, რაც კიდევ უფრო მეტად შეუწყობს ხელს საზოგადოების გარემოსდაცვით საკითხებში ჩართულობას
„მაკდონალდს საქართველო“ Mc Happy Day-ის საქველმოქმედო კამპანიას იწყებს
დამზადებულია საქართველოში - „სავალი“ - კიდევ ერთი ახალი ქართული წარმოების ბრენდი „დრესაპ ჯგუფისგან“
ახალი ლიბერთი ადამიანებისთვის - ლიბერთის ახალი საპილოტე პროექტი
BTU-ს სტუდენტური სტარტაპების საგრანტო კონკურსის გამარჯვებული ცნობილია
ლიბერთი პროექტის „ახალგაზრდული მეწარმეობა სოფლის განვითარებისთვის“ სტრატეგიული პარტნიორი  გახდა