თუ ვინმე პარლამენტის რეზოლუციაში ნონსენსების ჩაწერას არ მოინდომებს, ნორმალური, გაწონასწორებული, აზრიანი რეზოლუციის მიღების პრობლემა არ უნდა არსებობდეს, - აღნიშნული განცხადება უკრაინის მხარდამჭერი რეზოლუციის მიღების თაობაზე „ქართული ოცნების“ დეპუტატმა ირაკლი ქადაგიშვილმა გააკეთა.
ქადაგიშვილის თქმით, რესურსი იმისა, რომ რეზოლუციის ტექსტზე შეთანხმება შედგეს, არსებობს და ეს ის თემა არ არის, რაზეც პოლიტიკურ ჯგუფებს შორის კონსენსუსის მხრივ შესაძლოა პრობლემა შეიქმნას.
„რეზოლუცია არის პარლამენტის და ქვეყნის საერთო პოზიცია. ის, რომ ქვეყნის სუვერენიტეტი, ტერიტორიული მთლიანობა, უსაფრთხოების უზრუნველყოფის თავისუფალი არჩევანი დაცული უნდა იყოს, არც ერთ სახელმწიფოს მეორე ქვეყნის ტერიტორიის ხელყოფის უფლება არა აქვს და უკრაინას ვუცხადებთ სოლიდარობას, რადგან ჩვენც ოკუპაციის და აგრესიის ანალოგიური მძიმე ისტორია გვაქვს... არანაირი პრობლემა ნორმალური, გაწონასწორებული, აზრიანი რეზოლუციის მიღების არ უნდა არსებობდეს", - განაცხადა ირაკლი ქადაგიშვილმა.
მმართველ გუნდსა და ოპოზიციას შორის უკრაინის მხარდამჭერი რეზოლუციის ტექსტზე კონსულტაციები დღეს გაიმართება.